Më shumë civilë janë vrarë dhe plagosur në Donetsk pas dy ditësh sulmi nga Ukraina. Të paktën kështu pretendojnë zyrtarët nga Republika Popullore e Donetsk.
Duke iu referuar zyrtarëve të Donetskut, RT shkruan se dy persona u vranë dhe nëntë u plagosën.
Videot nga vendi i ngjarjes që kanë qarkulluar në rrjetet sociale tregojnë pjesë të raketave në tokë.
“Njerëzit bërtisnin dhe disa u lënduan. Dola menjëherë jashtë për të dhënë ndihmën e parë dhe për të parë nëse kishte ndonjë dëm.”- tha një grua vendase për RT. “Pashë municione në tokë dhe pak më larg pashë zjarre të mëdha – dyqanet po digjeshin… E njëjta gjë ndodhi dje – më shumë granatime.”
Zyrtarët raportuan se qyteti u godit disa herë të hënën, kur banorët po festonin 77-vjetorin e fitores mbi Gjermaninë naziste në Luftën e Dytë Botërore. Sipas tyre, mes viktimve ishte dhe një 16-vjeçar.
