Dy ekonomitë më të mëdha në botë ishin huamarrësit më me peshë në tre muajt e parë të këtij viti, pasi borxhi global u ngjit në mbi 305 trilionë dollarë, raportoi të mërkurën Instituti i Financave Ndërkombëtare (IIF).
Të dhënat e saj treguan se borxhi i Kinës u rrit me 2.5 trilionë dollarë gjatë tremujorit të parë dhe Shtetet e Bashkuara shtuan 1.5 trilionë dollarë. Borxhi i përgjithshëm në Eurozonë ra për të tretin tremujor radhazi, tha IIF.
Sipas analizës, shumë vende, si ato në zhvillim ashtu edhe ato të zhvilluara, po hyjnë në një cikël shtrëngimi monetar me nivele të larta të borxhit në dollarë.
“Ndërsa bankat qendrore ecin përpara me shtrëngimin e politikave për të frenuar presionet inflacioniste, kostot më të larta të huamarrjes do të përkeqësojnë dobësitë e borxhit.” – thuhet në raportin e IIF. “Ndikimi mund të jetë më i rëndë për ata huamarrës të tregut në zhvillim që kanë një bazë investitore më pak të larmishme.” – shtoi ai.
Burimet më të mëdha të rritjes së huamarrjes ishin borxhi i korporatave jashtë bankave dhe huamarrja e qeverisë.
Borxhi pa përfshirë sektorin financiar u rrit mbi 236 trilionë dollarë, rreth 40 trilionë dollarë më i lartë se dy vjet më parë kur goditi pandemia. Borxhi i qeverive është rritur më ngadalë në të njëjtën periudhë.
“Me nevojat për financim të qeverisë ende shumë mbi nivelet para pandemisë, çmimet më të larta dhe më të paqëndrueshme të mallrave mund të detyrojnë disa vende të rrisin shpenzimet publike edhe më tej për të shmangur trazirat shoqërore.” – thuhet në raport, duke vënë në dukje se ‘kjo mund të jetë veçanërisht e vështirë. për tregjet në zhvillim që kanë më pak hapësirë fiskale’.
IIF tha gjithashtu se rritja pritet të ngadalësohet ndjeshëm këtë vit, gjë që do të kishte implikime negative për dinamikën e borxhit.
