Firma konsulente amerikane McKinsey & Co thuhet se ka punuar me kontrata për Pentagonin dhe agjencitë e inteligjencës amerikane, ndërsa njëkohësisht ofronte shërbime për konglomeratin shtetëror rus të mbrojtjes Rostec, një pjesë e pajisjeve të së cilës po përdoren në Ukrainë, sipas NBC News.
Puna e McKinsey me Rostec vijonte ndërsa firma ndërmori projekte të ndjeshme të sigurisë kombëtare për Departamentin e Mbrojtjes të Amerikës dhe komunitetin e inteligjencës, raportoi NBC të shtunën. Firma konsulente amerikane i tha rrjetit të lajmeve se puna e saj me gjigantin rus të mbrojtjes dhe hapësirës ajrore nuk lidhej drejtpërdrejt me sistemet e armëve.
Marrëdhënia e dikurshme Rostec ngre pyetje mbi konfliktet e mundshme të interesit për një firmë që këshillon agjenci të ndryshme qeveritare të SHBA-së, në disa raste që përfshijnë çështje të sigurisë kombëtare dhe shumë prej korporatave kryesore të vendit, sipas NBC. McKinsey ka tërhequr më parë një shqyrtim të ngjashëm mbi punën e saj me kompanitë shtetërore në Kinë.
“Është vërtet e vështirë të kuptosh se si një firmë konsulente amerikane do të dëshironte të përfshihej në fusha të ndjeshme të mbrojtjes ruse, inteligjencës apo institucionit shkencor.” – tha për NBC konsulenti Scott Blacklin, ish-kreu i Dhomës së Tregtisë së SHBA-së në Rusi.
Zëdhënësi i McKinsey, Neil Grace tha se firma ka politika të rrepta për të parandaluar konfliktet e interesit dhe puna e saj jashtë shtetit është ‘e shkëputur”’nga projektet e saj në Uashington. Shërbimet e kompanisë për Rostec kishin të bënin me ‘tema tregtare dhe operacionale’ rutinë, tha ai duke shtuar se ‘nuk do ishte e drejtë apo e saktë të përshkruanim këtë punë si përfitim për ushtrinë ruse’.
Rostec është kompania më e madhe ruse e mbrojtjes dhe një nga degët e saj ka një monopol mbi eksportet ruse të armëve. Ai mbikëqyr kërkimin dhe zhvillimin e pajisjeve ushtarake, siç është avioni i ri luftarak ‘Checkmate’ dhe kompanitë e tij prodhojnë armatime duke filluar nga automjetet e blinduara luftarake deri tek helikopterët sulmues.
Siç vuri në dukje NBC, motorët e prodhuar nga Rostec fuqizojnë shumë nga raketat që janë përdorur në ofensivën ushtarake të Rusisë kundër Ukrainës.
McKinsey u akuzua më parë për injorimin e konflikteve të mundshme të interesit kur u konsultua me prodhuesit e opioideve dhe rregullatorin e tyre federal, Administratën e Ushqimit dhe Barnave, në kulmin e krizës së opioideve në SHBA.
Firma ra dakord vitin e kaluar të paguante 573 milionë dollarë për të zgjidhur akuzat se ajo ndihmoi shitjet e opioideve, duke ndihmuar në varësitë që çuan në më shumë se 400,000 vdekje.
