Inflacioni në Eurozonë tejkaloi pritshmëritë më të këqija dhe arriti një rekord prej 8.1% në maj në mes të rritjes së kostove të energjisë, sipas shifrave zyrtare të publikuara të martën.
Një vlerësim i shpejtë i agjencisë së statistikave të Bashkimit Evropian Eurostat zbuloi se komponenti kryesor i inflacionit në eurozonë është energjia, e cila pritet të rritet me 39.2% në maj, duke theksuar ndikimin e krizës globale të energjisë mes sanksioneve kundër Rusisë.
Çmimet e ushqimeve parashikohen të rriten me 7.5% krahasuar me 6.3% në prill, kostoja e mallrave industriale pritet të rritet me 4.2% dhe e shërbimeve me 3.5%.
Çmimet e konsumit në 19 vendet që përdorin monedhën euro po rriten tani me ritmin më të shpejtë që nga fillimi i regjistrimeve për euron në vitin 1997. Inflacioni vjetor në maj ishte parashikuar më parë të ishte deri në 7.8% kundrejt normës 7.4% në prill.
Ndërprerjet e zinxhirit të furnizimit për shkak të konfliktit në Ukrainë dhe bllokimeve të lidhura me Covid në Kinë kanë vënë presion shtesë mbi çmimet e konsumit.
Inflacioni vjetor është ndryshimi i nivelit të çmimeve të mallrave dhe shërbimeve të konsumit ndërmjet muajit aktual dhe të njëjtit muaj të një viti më parë.
Eurostat nxjerr një vlerësim të shpejtë në fund të çdo muaji referues. Të dhënat e plota për muajin maj do të publikohen më 17 qershor.
