Një 43-vjeçar është arrestuar në Shkodër pasi është kapur me një armë pa leje.
Në pranga ka përfunduar personi me iniciale K.K., banues në Muriqan pasi gjatë kontrollit në një lokal të fshatit është kapur me një pistoletë pa leje e një sasi fishekësh.
Ai dyshohet se është bashkëpunëtor në disa vjedhje në Shkodër e Mal të Zi.
Njoftimi
“Shërbimet e Komisariatit të Policisë Shkodër, në bashkëpunim me shërbimet e Forcës së Posaçme Shqiponja në DVP Shkodër, në vijim të punës për goditjen e rasteve të amëmbajtjes pa leje, bazuar dhe në informacionet e marra në rrugë operative, kanë organizuar dhe kanë finalizuar me sukses operacionin policor “Muriqani”.
Si rezultat i këtij operacioni u arrestua në flagrancë, për veprën penale “Mbajtja pa leje e armëve luftarake dhe e municionit”, shtetasi:
K.K., 43 vjeç, banues në fshatin Muriqan, Shkodër.
Ky shtetas është kapur nga shërbimet e Policisë, në një lokal në fshatin Muriqan, Shkodër, me një armë zjarri pistoletë, një krehër dhe disa fishekë.
Nga veprimet hetimore dyshohet se ky shtetas është bashkëpunëtor në disa vjedhje në Shkodër dhe në Malin e Zi. Vijojnë veprimet hetimore, në bashkëpunim edhe me homologët malazezë, për dokumentimin e plotë të veprimtarisë kriminale të këtij shtetasi, identifikimin dhe kapjen e bashkëpunëtorëve.
Materialet proceduriale i kaluan Prokurorisë pranë Gjykatës së Shkallës së Parë Shkodër, për veprime të mëtejshme.”
