Ministri i Jashtëm rus, Sergei Lavrov, nisi vizitën dyditore në Turqi, ku ai pritet të mbajë bisedime për zhbllokimin e eksporteve të drithërave nga Ukraina.
Në qendër të negociatave është edhe hapja e një korridori për anijet që transportojnë drithëra të Ukrainës. Turqia ka ofruar që të përcjellë anijet nga portet e Detit të Zi të Ukrainës, të cilat janë bllokuar nga ofensiva e Moskës.
Lavrov është paraparë që më 7 qershor të takohet me ministrin e Jashtëm turk, Mevlut Cavusoglu, për vazhdimin e bisedimeve dhe ministri i Mbrojtjes, Hulusi Akar tha se ka parë “përparim të rëndësishëm” për një marrëveshje të mundshme që do të lejonte eksportet e drithërave.
Deklaratat e Akar erdhën disa orë para arritjes së Lavrovit në Turqi.
Rusia ka marrë kontrollin e pjesëve të mëdha të bregdetit të Ukrainës qëkur ka nisur pushtimin më 24 shkurt, dhe luftanijet e saj kontrollojnë Detin e Zi dhe Detin Azov.
Presidenti rus, Vladimir Putin, javën e kaluar i tha homologut të tij turk, Recep Tayyip Erdogan, se Moska është e gatshme që të punojë me Ankaranë për të zhbllokuar eksportet detare.
Zëdhënësi i Kremlinit, Dmitry Peskov, u tha gazetarëve më 7 qershor se Ukraina duhet të largojë minat nga bregdeti i saj, në mënyrë që të lejohet eksporti i drithërave.
“Kjo do t’i lejojë anijet, pasi të kontrollohen nga ushtria jonë për t’u siguruar se nuk kanë armë, të hyjnë në porte, të marrin ngarkesat me drithëra dhe me ndihmën tonë të lundrojnë në ujërat ndërkombëtare”, tha Peskov.
