Shoqata Kombëtare e Gjyqtarëve është përfshirë në debatin për hartën e re gjyqësore mes bojkotit nga ana e Dhomës Kombëtare të Avokatëve.
Në një qëndrim zyrtar ajo thekson se e ka mbështetur reformën e përgatitur nga Këshilli i Lartë Gjyqësor me mendime e nisma për ndërtimin e një sistemi gjyqësor eficent.
Më tej në reagim shoqata shkruan se harta e re gjyqësore do mundësojë shpërndarjen e barabartë të burimeve njerëzore në dispozicion.
“Shoqata Kombëtare e Gjyqtarëve të Republikës së Shqipërisë ka ndjekur me mjaft vëmendje dhe interes të gjithë procesin e hartimit të dokumentit analitik të hartës së re gjyqësore të përgatitur nga Këshilli i Lartë Gjyqësor, në konsultim dhe bashkëpunim edhe me aktorë të tjerë të procesit.
Reforma në sistemin e drejtësisë, e mbështetur që në krye të herës nga ana e Shoqatës me mendime dhe nisma propozuese, si një ndër qëllimet e saj kryesore ka ndërtimin e një pushteti gjyqësor efiçent, në pikëpamje kohore, cilësore dhe ekonomike. Për ta realizuar këtë lipset projektimi i një strukture gjyqësore që ta maksimizojë këtë qëllim si dhe një shpërndarje e studiuar e burimeve njerëzore në këtë aspekt.” – thuhet në reagimin e shoqatës.
Më tej në deklaratën zyrtare shoqata bën me dije se vertingu ka krijuar boshllëqe të mëdha në pushtetin gjyqësor megjithatë gjyqtarët janë të vendosur për të vijuar me reformën, pasi ajo sipas tyre do i japë vendit shërbim gjyqësor sa më cilësor.
“Edhe pse procesi i vettingut krijoji boshllëqe të mëdha në pushtetin gjyqësor kjo nuk e zbehu aspak, përkundrazi e shtoi vendosmërinë e subjekteve të angazhuara në procesin e skicimit të hartës së re gjyqësore, e cila do të shërbejë jo vetëm për të zbutur sado pak pasojat e këtij procesi të nevojshëm për sistemin e drejtësisë, por edhe për t’i dhënë vendit një shërbim gjyqësor sa më cilësor në të ardhmen.
Shoqata Kombëtare e Gjyqtarëve të Republikës së Shqipërisë vlerëson maksimalisht punën gati tre vjeçare të udhëhequr deri më tani nga Këshilli i Lartë Gjyqësor lidhur me analizën dhe projektimin e hartës së re gjyqësore. Gjithashtu, Shoqata shprehet se harta e re do t’i përgjigjet më së miri nevojave të qytetarëve për dhënien e një drejtësie cilësore dhe në kohë të barabartë për të gjithë. Specializimi i gjyqtarëve dhe ecja me shpejtësi të njëjtë e çështjeve të ngjashme, në të gjithë gjykatat e Republikës, përbën një synim dhe sfidë që do të përmbushet pa më të voglin dyshim nga riorganizimi gjyqësor i parashikuar në këtë dokument.” – vijon reagimi.
Në fund të deklaratës shoqata nxit miratimin sa më shpejt të hartës së re gjyqësore që do i shërbejë të tashmes e së ardhmes së drejtësisë në vend.
“Për këtë shkak, ajo mbështet dhe inkurajon miratimin sa më parë të këtij dokumenti me rëndësi strategjike për të tashmen dhe të ardhmen e drejtësisë në vendin tonë. Së fundi, Shoqata shprehet e angazhuar që, si gjithmonë, të mos e kursejë ndihmën e saj për çdo iniciativë që çon në përmirësimin e standardit të dhënies së drejtësisë në vendin tonë.” – mbyllet deklarata.
Që prej së martës së shkuar Dhoma e Avokatisë ka bojkotuar thuajse të gjitha seancat në gjykata në shenjë proteste kundër hartës së re gjyqësore. Sipas saj, kjo reformë cenon rëndë dhënien e drejtësisë për qytetarët duke shtuar jashtëzakonisht kostot.
Një pjesë e avokatëve në vend e kanë kundërshtuar protestën duke thënë se nuk është mënyra e duhur për të zgjidhur çështjen. KLGJ-ja nga ana e saj ka mbrojtur reformën duke thënë se ajo do u shërbejë qytetarëve duke u dhënë drejtësi të barabartë e në të njëjtën kohë atyre.
