Kaosi mbretëroi në aeroportet e Parisit, ndërsa punonjësit vazhduan protestën e tyre për paga më të mira për të tretën ditë radhazi të shtunën. Dhjetra fluturime janë anuluar në aeroportin kryesor të Parisit, “Roissy-Charles de Gaulle“ Ndërsa udhëtarët janë përballur me një sërë problemesh, Duke përfshirë bagazhet e humbura dhe radhët e gjata.
Një në pesë fluturime u anulua, sipas një raporti nga e përditshmja Liberation. Autoritetet e aeroportit lëshuan këshilla duke u kërkuar udhëtarëve të mbërrinin të paktën dy deri në tre orë përpara fluturimeve të tyre.
Punonjësit e aeroportit të Parisit, përfshirë punëtorët me kontratë dhe të përkohshëm, si dhe zjarrfikësit janë në grevë që nga e enjtja. Ata kanë paralajmëruar një tjetër grevë në datat 8-10 korrik, fundjavë që shënon fillimin e pushimeve verore, për të përmbushur kërkesat e tyre. Punëtorët po synojnë një rritje prej 6% të pagës që nga data 1 janar dhe rekrutim urgjent për të përballuar kërkesën në rritje për udhëtime.
Oferta e operatorit të aeroportit ADP për të bërë një rritje prej 4% që hyn në fuqi më 1 korrik u kundërshtua, tha Daniel Bertone, një përfaqësues i sindikatës CGT, sipas France24. Punëtorët akuzojnë drejtuesit se kanë mbyllur një sy ndaj nevojës për më shumë staf dhe për të detyruar punonjësit ekzistues të punojnë me turne më të gjata pa pagesë shtesë.
Zyrtarët e sindikatës thanë se trafiku dhe fitimet e aeroportit janë rritur në nivelet para pandemisë, por punëtorët nuk kanë marrë rritje pagash që nga viti 2019.
