Deputeti i Partisë Demokratike, Belind Këlliçi, në një intervistë për “Radar Informativ” zbuloi detaje nga organizimi i protestës së 7 korrikut.
Këlliçi theksoi se protesta nuk bëhet për Sali Berishën dhe se do jetë paqësore.
“Do të jenë folësit që do të përfaqësojnë grupe të ndryshme të interesit. Do të fillojmë në 19:00. Është bërë thirrja që do të jetë protestë paqësore. Do të jenë të rinjtë që do të bëjnë rrethin e sigurisë. Është një protestë që bëhet për qytetarët. Nuk bëhet për Sali Berishën. Ai e tregoi peshën e tij qoftë me foltoren qoftë me 6 mars. Ai tani e ka sfidë që gjithë këtë besim që i është dhënë ta meritojë dhe ta përkthejë në rritje të opozitës. Kjo protestë bëhet për qytetarët dhe është një pikëtakimi me Shqipërinë. Ne preferojmë që të përfaqësojë 100% qytetarët. Do të dominojnë simbolikat kombëtare”, tha ai.
Këlliçi shtoi më tej se do të ketë edhe një ndjesë nga ana e PD, për opozitarizmin e dështuar në 9 vite.
“Do të ketë edhe një ndjesë nga ana e PD që për shumë arsye i kemi lënë shqiptarëve Edi Ramën mbi kurriz. Është një pikëtakimi me qytetarët dhe aty do të merren të gjitha impresionet. Është nisja e stinës së protestave. Do të ketë protesta në seri.
Ju keni parë të gjithë zinxhirin drejtues të PD në terren duke takuar qytetarët. Protesta është paqësore. Ne po i ftojmë qytetarët të vijnë me fëmijët. Jo më kot ju përmenda që të rinjtë do të jenë të parët që do të mbërrijnë në shesh për tu vendosur kordon përpara kordonit të policisë, në shenjë paqeje.
Është nisja e një stine protestash. Synimi jonë është largimi i Edi Ramës. Kemi 9 vite që e flasim, por kemi vetëm një muaj…padiskutim qëllimi politik është ky. Por nuk mundet që ta mohoj që ne kemi më shumë se një vit që nuk dalim në protestë. Është një ritakim me qytetarët”, u shpreh deputeti.
