Partia Demokratike i ka bërë thirrje SPAK-ut të nisë hetimet për zbardhjen e abuzimeve në sektorin e energjetikës, që nga tenderat sekretë deri te financat e operatorëve të fushës.
Eksperti për Energjinë në Partinë Demokratike Eduard Elezaj ka dalë në një deklaratë për mediet nga selia blu, duke ngritur akuza ndaj KESH-it, se ka shpenzuar të shtunën 20 milion euro për blerje energjie vetëm për një periudhë 6 ditore.
Ai shprehet se Korporata Elektro-Energjetike shqiptare, është kthyer në “KESH-in e partisë”.
“Pse KESH nuk ka siguruar energji elektrike përmes procedurave mujore apo 3 mujore, por ka blerë energji me periudha disa ditore?
Pse KESH ka zhvilluar rreth 45 procedura blerje të energjisë elektrike, nga janari deri tani, duke fshehur të dhënat e këtyre tenderave?”- pyet Elezaj.
Më tej ai i kërkon SPAK-ut të hetojë për zbardhjen e abuzimeve në sektorin e energjisë që nga tenderat sekretë deri te financat e operatorëve të fushës.
DEKLARATË E ELEZAJT:
Korporata Elektro-Energjetike shqiptare, e kthyer në ‘KESH-in e partisë’, ka shpenzuar të shtunën 20 milion euro për blerje energjie.
Nëse mendoni se me aq para është blerë energji për disa muaj, e keni gabim. Bëhet fjalë për vetëm një javë, periudhën 11-17 korrik.
Çka e kthen këtë rast në skandal dhe shpërdorim të parasë publike, është fakti se ditën kur është bërë blerja, çmimi në bursë ka qenë 110 euro për MËH. KESH ka shpenzuar 473.76 Euro/MËH.
Sipas një përllogaritje të shpejtë janë harxhuar 15 milion euro më shumë.
Partia Demokratike bën këto pyetje, në emër të çdo qytetari që shqetësohet për çmimin e energjisë, sepse e paguan nga xhepi:
Pse për këtë blerje është harxhuar trefishi i çmimit të bursës?
Pse KESH nuk ka siguruar energji elektrike përmes procedurave mujore apo 3 mujore, por ka blere energji me periudha disa ditore?
Pse KESH ka zhvilluar rreth 45 procedura blerje të energjisë elektrike, nga janari deri tani, duke fshehur të dhënat e këtyre tenderave?
Pse KESH nuk ka publikuar të dhënat e kompanive pjesëmarrëse në tender, çmimet e ofruara prej tyre, apo fituesit?
Pse qeveria, ndërkohë që ka deklaruar krizë energjetike deri në Dhjetor 2022, nuk ka marrë asnjë masë për të përballuar krizën?
Partia Demokratike i kërkon SPAK të nisë hetimet e menjëhershme për zbardhjen e abuzimeve në sektorin e energjetikës, që nga tenderat sekretë deri te financat e operatorëve të fushës.
