Fondi Monetar Ndërkombëtar do ulë ndjeshëm parashikimin e tij për rritjen ekonomike globale në përditësimin e tij të ardhshëm, sipas Ceyla Pazarbasioglu, drejtoreshë për strategjinë, politikat dhe rishikimin në FMN, siç raportohet nga Bloomberg.
“Bëhet fjalë për tronditje pas tronditjeje që po godasin me të vërtetë ekonominë globale.” – tha ajo në një panel të dielën në Bali, Indonezi, duke theksuar se rritja e çmimeve për ushqimin dhe energjinë, rënia e flukseve të kapitalit në tregjet në zhvillim, pandemia Covid, së bashku me një ngadalësim në Kinë, e bëjnë ‘shumë më sfidues’ për politikëbërësit që të hartojnë një strategji ekonomike efektive.
Në raportin e prillit, FMN uli perspektivën e saj për rritjen globale këtë vit në 3.6%, nga 4.4%, duke përmendur rritjen e rreziqeve inflacioniste dhe shtrëngimin agresiv të Bankës Qendrore.
Në një rishikim që pritet këtë muaj, ‘ne do ulim ndjeshëm parashikimin tonë’, tha Pazarbasioglu.
Rregullatorët monetarë në të gjithë globin po luftojnë për të përballuar rritjen e çmimeve të nxitura nga çështjet e furnizimit, të zhvilluara që në fazat e hershme të pandemisë.
“Rruga drejt një uljeje të butë po ngushtohet. Ne mendojmë se është ende një rrugë e realizueshme, por sigurisht jo shumë e lehtë.” – tha në të njëjtin panel, sipas agjencisë së lajmeve, Hyun Song Shin, kreu i kërkimit në Bankën për Zgjidhjet Ndërkombëtare.
