Shteti amerikan i Massachusetts ka përmbysur një dënim për magji nga mbi 300 vjet më parë, pasi një mësuese shkolle dhe nxënësit e saj bënë fushatë për të pastruar emrin e një gruaje të sëmurë mendore të dënuar gjatë gjyqeve famëkeqe të shtrigave në Salem.
Shfajësimi i 22-vjeçares Elizabeth Johnson Jr vjen si pjesë e një fature buxheti shtetëror prej 53 miliardë dollarësh të nënshkruar nga guvernatori i Massachusetts, Charlie Baker të enjten, rreth 329 vjet pasi gruaja u akuzua si shtrigë.
Johnson Jr ishte në mesin e mbi 200 njerëzve të dyshuar për ushtrimin e magjisë gjatë gjyqeve të shtrigave në Salem midis viteve 1692 dhe 1693. Gjykimet, të cilat u nxitën nga bestytnitë, frika nga sëmundjet dhe paranoja të tjera ccuan në varjen e 19 njerëzve ndërsa një tjetër u dënua me vdekje duke u gurëzuar.
Johnson ishte një nga 10 të tjerët që u gjetën fajtorë për magji dhe u dënuan me vdekje. Megjithatë, për shkak të një urdhri të Guvernatorit William Phips në 1693, ato ekzekutime u ndaluan. Johnson Jr vdiq në 1747 në moshën 77-vjeçare.
Ndërsa shumica e grave të quajtura shtriga gjatë gjyqeve u janë pastruar emrat e tyre, Johnson Jr deri më tani ishte lënë jashtë, me sa duket për shkak se ajo nuk kishte pasardhës që luftonin për të pastruar emrin e saj.
Kjo e shtyu mësuesen Carrie LaPierre dhe nxënësit e saj në shkollën e mesme të North Andover të nisin një fushatë për të hequr akuzat ndaj gruas, të ndihmuar nga Senatorja Diana DiZoglio, e cila ndihmoi në mbrojtjen e kauzës dhe përfundimisht e përfshiu mocionin në projektligjin vjetor të buxhetit të shtetit.
LaPierre i tha New York Times se ajo e mori idenë ndërsa ajo dhe klasa e saj po mbulonin gjuetinë famëkeqe të shtrigave si pjesë e kurrikulës vjetore të shkollës.
Gjatë mësimeve, ajo kuptoi se ndryshe nga dhjetëra gra dhe burra të shpallur fajtorë nga zyrtarët e qytetit të Salem, emri i Johnson nuk u pastrua kurrë zyrtarisht.
Klasa më pas i kërkoi një ligjvënësi vendas në lidhje me perspektivat e anulimit të vendimit dhe lutja e tyre përfundimisht arriti tek Senatorja e Massachusetts, DiZoglio.
