Trajneri i ri i Manchester United, Erik ten Hag, duket se ka vënë vijën e kuqë kur bëhet fjalë për sjelljen e fundit të Cristiano Ronaldos në ekipin e Premier League, pasi ai përshkroi vendimin e Ronaldos për t’u larguar nga ‘Old Trafford’ para përfundimit të ndeshjes miqësore të fundjavës së kaluar kundër Rayo Vallecanos si të ‘papranueshëm’.
E ardhmja e pesë herë fituesit të Topit të Artë ka qenë një nga historitë më interesante të kësaj vere pasi Ronaldo kërkoi që klubi ta lejonte të largohej gjatë afatit kalimtar, me dëshirën e tij për të luajtur futboll në Champions League që mendohet të jetë shtysë.
Ronaldo, i cili kishte anashkaluar pjesën më të madhe të stërvitjes parasezonale të Man United, luajti 45 minuta në miqësoren e së dielës së kaluar kundër skuadrës spanjolle dhe më vonë u pa duke u larguar nga ‘Old Trafford’ para përfundimit të lojës, siç bëri bashkëkombasi i tij portugez Diogo Dalot.
Duke folur me mediat holandeze, Ten Hag pohoi se arsyetimi i Ronaldos për mungesën e seancave stërvitore parasezonale ishte lejuar nga klubi për shkak të një çështjeje familjare – por se ai nuk e miratoi veprimin e Ronaldos, apo ndonjë lojtari tjetër, që të largohej nga stadiumi në fillim të fundjavës së kaluar.
“Sigurisht që jo. Kjo është e papranueshme. Për të gjithë.” – tha Ten Hag, i cili shtoi se ‘kishte shumë të tjerë’ që bënë të njëjtën gjë.
“Unë u them atyre kjo është e papranueshme dhe se ne jemi një ekip, një skuadër. Duhet të qëndroni deri në fund”.
Mbetet për t’u parë nëse Ronaldo do të konsiderohet për përzgjedhjen për ndeshjen hapëse të United në Premier League kundër Brighton të dielën, megjithëse në sipërfaqe të paktën, duket e pamundur duke pasur parasysh se ai ka luajtur vetëm 45 minuta futboll që nga fundi i sezonit të kaluar.
Sa i përket faktit nëse portugezi, i cili mbush 38 vjeç gjatë sezonit të ardhshëm, do të marrë transferimin për të cilin është përpjekur, edhe ky mbetet mister.
