Kreu i PD-së Sali Berisha ka kujtuar këtë të mërkurë poetin Havzi Nela në 34-vjetorin e varjes së tij.
Mes rreshtash ai ka bërë edhe një thirrje për kryeministrin Edi Rama: “Edvin, sot është dita që duhet të dënosh firmën e xhelatëve, ndër të cilëve edhe të babait tënd, për varjen e tij”.
Berisha i thotë Ramës të tregojë një grimcë ndërgjegje dhe të dënojë “krimin mizor të të atit të tij xhelat” si dhe t’i kërkojë ndjesë publike familjes. Më pas ai shton se këto rreshta nuk i shkruan për politikë.
KOMENTI I PLOTË
Sot 34 vjetori i martirizmit të poetit disident hero të fjalës së lirë Havzi Nela!
Edvin, sot është dita që duhet të dënosh firmën e xhelatëve, ndër të cilëve edhe të babait tënd, për varjen e tij.
Kërko ndjesë!!
Të dashur miq,
Sot mbarë kombi shqiptar përulet me nderimin më të madh para kujtimit dhe veprës së pavdekshme të martirit të lirisë, poetit disident, heroit të fjalës, Havzi Nela, i cili 34 vjet më parë u var për fjalën e lirë për vargjet e tij në sheshin kryesor të qytetit të Kukësit me firmën e xhelatëve të diktaturës staliniste Ramiz Alia dhe Kristaq Rama, babai bilogjik i Edi Ramës.
Ky akt horror që dëshmon fytyrën mizore të diktaturës hoxhiste, kishte synim kryesor jo vetëm hakmarrjen primitive të xhelatëve të regjimit por edhe terrorizimin e popullatës në tërësi dhe inteligjencës shqiptare në veçanti dhe të vriste pa lindur çdo varg apo fjalën e lirë.
Nderim përjetë poetit disident Havzi Nela.
Këtu më poshtë keni një poezi të poetit Havzi Nela dhe një status për të birin e xhelatit Kristaq Rama që së bashku me diktatorin Ramiz Alia firmosi varjen në litar të poetit disident.
– Poezia “Fryma e Helsinkit” nga Havzi Nela
Kështjella feudale tundet e lëkundet
Si nji varkë e thyeme mbi valët përkundet;
Tirani mizor me detin sot po mundet
Thellë, gjithnji ma thellë n’mes dallgëve po futet.
Fryma e Helsinkit u derdh porsi era
Na përkëdheli zemrat, çeli si pranvera;
Këtu në votrat tona futi gaz e shpresë
Na zgjoi afsh e vrull, ndoshta, nuk do vdesë!
-Sot është një ditë që mund të bëheshe njeri Edvin!
Sot është 34 vjetori i varjes në litar në sheshin qendror të qytetit të Kukësit të poetit disident Havzi Nela, me firmë të xhelatëve Ramiz Alia dhe Kristaq Rama, babait tënd biologjik.
Sot është një ditë që Edvin Kristaq Xhelati mund të “varë” brenda vetes ç’njerëzoren e neobllokmenit dhe të tregojë qoftë dhe për pak çaste një grimcë ndërgjegje të njeriut të qyteteruar, të dënojë krimin mizor të të atit të tij xhelat dhe t’i kërkojë ndjesë publike familjes dhe së paku botës së letrave për varjen me firmën e Ramiz Alisë dhe Kristaq Ramës të poetit disident Havzi Nela. Këto pak rreshta nuk i shkruaj për politikë por si një apel për ngadhënjimin e njeriut mbi antinjeriun!
