Një shpërthim i fuqishëm tronditi një shesh në kryeqytetin armen të dielën, duke rezultuar në dhjetëra viktima, sipas Ministrisë së Emergjencave të vendit.
Sipas të dhënave paraprake të Ministrisë së Shëndetësisë, një person ka vdekur dhe 26 të tjerë janë plagosur në shpërthimin në sheshin tregtar ‘Surmalu’ në Jerevan.
Administrata e qytetit ka thënë se ka disa persona të ngecur nën rrënoja dhe se një operacion shpëtimi është duke u zhvilluar.
Më vonë, shërbimet e urgjencës raportuan se numri i viktimave ishte rritur në 34.
Ministria tha se shpërthimi në qendër u pasua nga një zjarr, me video të postuara në rrjetet sociale që përshkruanin shtëllunga të mëdha tymi. Dëshmitarët në vendin e ngjarjes raportuan gjithashtu disa shpërthime të vogla, të cilat mund të kishin ardhur nga fishekzjarre.
Një ndërtesë në terrenin e sheshit ku ndodhej një dyqan mjetesh piroteknike thuhet se është shembur. Shkaku i saktë i shpërthimit është i paqartë.
Disa zyrtarë të lartë armenë kanë mbërritur në vendngjarje, duke përfshirë kryetarin e parlamentit, Alen Simonyan, kreun e Shërbimit të Sigurisë Kombëtare, Sarkis Hovhannisyan dhe një zëvendësministër të Shëndetësisë.
