Vlerësimi i miratimit të kancelarit gjerman Olaf Scholz ka arritur pikën më të ulët që kur ai mori detyrën në dhjetor. Vetëm 25% e publikut është i kënaqur me punën që ai bën, zbulon një sondazh i publikuar nga Bild të dielën.
“Nuk po funksionon si për Scholz-in ashtu edhe për qeverinë e koalicionit ‘semafor’.” – tha tabloidi ndërsa ndau rezultatet e sondazhit, të kryer nga instituti kërkimor INSA i Gjermanisë.
Vetëm 25% e të anketuarve e miratojnë punën e kancelarit, me 62% që shprehin mosmiratim.
Nëse zgjedhjet do mbaheshin tani, Scholz do të përfundonte vetëm i treti me 18% të votave.
Ministri i Ekonomisë Robert Habeck i Partisë së Gjelbër dhe Friedrich Merz, i cili kryeson Bashkimin Kristian Demokrat (CDU) të opozitës, janë tani për tani më të popullarizuar.
Shifrat për koalicionin ‘semaforik’, i cili bashkon Partinë Social Demokrate (SPD), Partinë Demokratike të Lirë (FDP) dhe të Gjelbërit, ishin po aq të këqija sa ato për Scholz. Vetëm 27% u thanë anketuesve se ishin të kënaqur me qeverinë, ndërsa 65% thanë se kishin një pikëpamje negative për vendimet e saj.
Vlerësimet e Scholz kanë qenë në një rënie të vazhdueshme që kur u bë kancelar tetë muaj më parë, tha Bild. Në mars, kur konflikti në Ukrainë sapo kishte filluar, ai u mbështet nga 46%, por në prill, numri ra në 38%.
Problemet ekonomike të shkaktuara nga pandemia Covid-19 janë përkeqësuar më tej nga kufizimet perëndimore ndaj Moskës dhe rënia e mëvonshme e furnizimeve me gaz rus në BE.
Pavarësisht se është ekonomia kryesore e Evropës, Gjermania është goditur rëndë nga rritja e çmimeve të gazit pasi përballet me rrezikun e mungesës së energjisë këtë dimër. Të dielën, kreu i Bankës Qendrore Gjermane paralajmëroi se ‘një normë inflacioni qoftë edhe 10% është e mundur në muajt e vjeshtës’, diçka që nuk është parë në vend për më shumë se 70 vjet.
