Në një deklaratë për mediet nga selia blu, kryetari i PD-së Sali Berisha tha se kërcënimin më të madh për sigurinë kombëtare të Shqipërisë e ka bërë kryeministri Edi Rama.
“Agresorët e ushtarëve në detyrë, u ndaluan dhe janë hetim. Cila është lidhja e tyre me shërbimet duhet të qartësohet. Por e vërteta është se përdorimi i lëndëve djegëse dhe neuroparalizuese dhe toksike, kundër ushtarëve, komprometon thellësisht ‘misionin’ e tyre turistik.
Unë sot jam këtu për të deklaruar, se kërcënimin më të madh në këto vite ndaj sigurisë kombëtare, me akte madhore e ka bërë personalisht, Edi Rama. Po ju rikujtoj këtu se 5 vite më parë në një mënyrë të pashembullt në historinë e një vendi, të lirë apo jo, mediat shqiptare publikuan të gjithë organigramën e shërbimit shtetërore, emër, mbiemër, degë dhe funksion. Ata publikuan dhe rrogat e tyre, duke ekspozuar kështu këtë shërbim ndaj të gjitha shërbimeve të tjera, jo miqësore.
Deklaroj këtu se këtë e ka bërë Edi Rama, pasi askush tjetër në Republikën e Shqipërisë, përveç kryeministrit që firmos çdo vit strukturën e SHISH, ka të drejtë të njihet me të, apo ta kërkojë atë.”- tha Berisha. Kjo deklaratë e tij vjen pa zhvillimeve të fundi në vend, ku dy ditë më parë u ndaluan në Uzinën Ushtarake të Gramshit dy rusë dhe një ukrainas, pasi sulmuan dy ushtarakë me spraj neuroparalizues.
