Shtetet e Bashkuara thanë se mbeten të shqetësuara për censurimin e fjalës së lirë nga Turqia dhe grupet e grave protestuan në Stamboll të shtunën, pas arrestimit të yllit të popit Gulsen e cila akuzohet për fyerje ndaj shkollave fetare.
Këngëtarja u burgos të enjten në pritje të gjyqit me akuzën e nxitjes së urrejtjes pasi një video e komentit të saj në skenë në prill u transmetua nga një media pro-qeveritare. Ndërsa disa ministra dënuan fjalët e Gulsen, arrestimi i saj tërhoqi një përgjigje të ashpër nga kritikët që e shohin qeverinë e presidentit Tajip Erdogan të prirur për të ndëshkuar ata që kundërshtojnë pikëpamjet e saj konservatore.
Një zëdhënës i Departamentit të Shtetit të SHBA tha se mbetet i shqetësuar për përpjekjet e përhapura në Turqi për të kufizuar shprehjen nëpërmjet censurës dhe ngacmimeve gjyqësore pas ndalimit të Gulsen.
Protestuesit në Stamboll kritikuan atë që ata e quajtën mospërputhje midis mosveprimit të gjyqësorit ndaj dhunës ndaj grave dhe hetimit dhe arrestimit të shpejtë të artistes. Shumë thonë se Gulsen ishte në shënjestër për pikëpamjet e saj liberale dhe mbështetjen e saj për të drejtat e LGBT+.
“Qindra gra do ishin gjallë sot nëse burrat që sulmuan gratë e tjera do kapeshin aq shpejt sa Gulsen.” – u thanë organizatorët e protestës në Stamboll demonstruesve përmes një altoparlanti.
Në videon e shfaqjes së saj në prill, Gulsen i referohet një muzikanti në grupin e saj dhe thotë në mënyrë të butë: “Ai ka studiuar më parë në një mederse për t’u bërë imam. Ja nga vjen çoroditja e tij.”
Gulsen të enjten i kërkoi falje kujtdo që u ndje i fyer nga komentet e saj, duke thënë se ato u kapën nga disa që duan të polarizojnë shoqërinë.
Përgatiti për Hashtag.al, K.Manjani
