Qindra mijëra argjentinas dolën në sheshin kryesor të kryeqytetit të premten në shenjë solidariteti kundër një atentati tronditës ndaj zv/presidentes së vendit një ditë më parë, i cili shkaktoi një valë mbështetjeje në një vend të polarizuar politikisht dhe të kapur nga kriza ekonomike.
Një person drejtoi një pistoletë të mbushur nga një distancë e afërt drejt zëvendëspresidentes Cristina Fernandez de Kirchner jashtë shtëpisë së saj në Buenos Aires, ku turmat ishin mbledhur të enjten mbrëma, por arma nuk arriti të shkrepej.
Autoritetet ende nuk kanë përcaktuar një motiv për sulmin ndaj Fernandez de Kirchner.
Cristina Fernandez de Kirchner
Plaza de Mayo historike e Buenos Aires, pranë zyrave presidenciale të Casa Rosada, u tejmbush të premten nga një turmë e përkrahësve të saj që valëvitnin flamuj së bashku me sindikatat aleate dhe aktivistë të tjerë.
“Faleminderit Zotit dhe Virgjëreshës që pistoleta nuk u shkreh”, tha mësuesi 58-vjeçar Santiago Bianco.
Fernandez de Kirchner, një figurë polemiste që është padyshim operatori politik më i fuqishëm i Argjentinës, po përballet me akuza të mundshme korrupsioni të lidhura me një skemë të supozuar për të devijuar fondet publike, ndërsa ishte presidente midis 2007 dhe 2015. Një prokuror javët e fundit bëri thirrje për një dënim me 12 vjet burg .
Ajo mohon të ketë shkelur ligjin dhe mbështetësit e saj janë mbledhur në rrugë çdo ditë jashtë rezidencës së saj, duke kritikuar gjyqësorin dhe opozitën konservatore për udhëheqjen e asaj që ata thonë se është një gjueti shtrigash kundër saj.
