Policia e Britanisë ka frikë nga një rritje e mprehtë e kategorive të caktuara të krimit dhe një rrezik për trazira civile këtë dimër mes rritjes së kostos së jetesës dhe krizës së energjisë, raporton Sunday Times, duke cituar një dokument strategjie kombëtare të zbuluar.
Dokumenti i përpiluar nga shefat e policisë paralajmëron se ‘trazirat ekonomike dhe paqëndrueshmëria financiare’ mund të çojnë në një rritje të veprave të tilla si vjedhjet e dyqaneve, vjedhjet e automjeteve, mashtrimet në internet dhe shantazhet. Më shumë fëmijë ka të ngjarë të bashkohen me bandat e drogës dhe më shumë gra mund të bëhen subjekt i shfrytëzimit seksual.
Planifikimi i emergjencës thuhet se është duke u zhvilluar për t’u marrë me pasojat e mundshme nga kriza e kostos së jetesës.
‘Presioni ekonomik i zgjatur dhe i dhimbshëm’ mund të krijojë një rrezik për ‘trazira më të mëdha civile’, të ngjashme me trazirat në Londër të vitit 2011, citohet të ketë thënë gazeta.
Vetë policia mund të preket gjithashtu.
“Cenueshmëria më e madhe financiare mund të ekspozojë disa punonjës ndaj rrezikut më të lartë të korrupsionit, veçanërisht në mesin e atyre që bien në borxhe të konsiderueshme ose vështirësi financiare.” – tha gazeta.
Parashikimi i zymtë u zbulua teksa sot pritet që vendi të zbulojë emrin e kryeministrit të ri. Të dy kandidatët, Sekretarja e Jashtme Liz Truss dhe ish-kancelari Rishi Sunak, janë zotuar të ndërmarrin veprime të shpejta për të adresuar kostot e larta të energjisë.
Ndërsa Sunak ka premtuar mbështetje të synuar për më të varfërit në shoqëri, kryesuesja Truss nuk ka zbuluar hollësi të strategjisë së saj.
Daily Mail ka raportuar se këtë dimër mund të ndodhë që njerëzit të mos gatuajnë pas orës 20:00 dhe të mos përdorin lavatriçe ose pjatalarëse midis orës 14:00 dhe 20:00 si pjesë e racionimit të energjisë. Pub-et mund të urdhërohen të mbyllen në orën 21:00 dhe shkollat mund të kalojnë në javë tre-ditore.
Kriza energjetike në Evropë është përkeqësuar nga sanksionet ndaj Moskës për konfliktin në Ukrainë dhe një rënie në furnizimet me gaz natyror rus. Ndërsa Britania e Madhe nuk varet drejtpërdrejt nga Moska për karburant, ajo ende po vuan.
Fatura tipike vjetore e karburantit për familjet pritet të rritet në rreth 3,500 stërlinanga tetori, tre herë më e lartë se vitin e kaluar. Sipas raportit të fundit të Bankës së Anglisë, inflacioni do të rritet në 13% në tetor dhe nga tremujori i katërt i këtij viti, Britania e Madhe parashikohet të hyjë në recesion.
