BE-ja beson se rrjedhjet në dy tubacionet kryesore të gazit nga Rusia në Evropë u shkaktuan nga sabotazhi, por nuk akuzojnë drejtpërdrejt Rusinë për këtë.
Kryetarja e Komisionit Evropian, Ursula von der Leyen tha se ndërprerja e qëllimshme do të rezultonte në “përgjigjen më të fortë të mundshme”.
Ndërsa Ukraina shkon më tej, duke akuzuar Rusinë për një “sulm terrorist“, siç shkruan BBC.
BE-ja e ka akuzuar më parë Rusinë për përdorimin e furnizimeve me gaz dhe linjën Nord Stream, si një armë kundër Perëndimit. Por zëdhënësi i Kremlinit Dmitry Peskov hodhi poshtë akuzat për sabotim si “të parashikueshme, budallaqe dhe absurde”.
Sekretari amerikan i Shtetit Antony Blinken tha se ai mendonte se rrjedhjet “nuk do të kishin një ndikim të rëndësishëm në elasticitetin energjetik të Evropës”. Asnjë tubacion nuk po transporton gaz për momentin, megjithëse të dy përmbajnë gaz.
Blinken nuk e akuzoi drejtpërdrejt Rusinë – por tha se nuk do të ishte në “interesin e askujt” nëse ato shkaktoheshin qëllimisht.
Presidenti i Këshillit Evropian, Charles Michel, i bëri jehonë mesazhit të zonjës von der Leyen.
“Aktet e sabotimit të Nord Stream duket se janë një përpjekje për të destabilizuar më tej furnizimin me energji në BE.”– tha ai në Twitter.
Ministri danez i Energjisë, Dan Jorgensen, tha se rrjedhjet ka të ngjarë të zgjasin për të paktën një javë, derisa gazi që del nga tubat të mbarojë. Pas kësaj do të fillonte hetimi.
Operatorët e Nord Stream 2 paralajmëruan për një humbje të presionit në gazsjellës të hënën pasdite. Kjo bëri që autoritetet daneze të thonë se anijet duhet të shmangin zonën pranë ishullit Bornholm.
Më pas të martën, operatori i Nord Stream 1 tha se linjat nënujore kishin pësuar njëkohësisht dëmtime “të paprecedentë” brenda një dite.
Gazsjellësi Nord Stream 1 – i cili përbëhet nga dy degë paralele – nuk ka transportuar asnjë gaz që nga gushti kur Rusia e mbylli atë. BE tha se po përpiqej të armatizonte furnizimin me gaz të Evropës.
Nord Stream 1 shtrihet 745 milje (1200 km) nën Detin Baltik nga bregu rus pranë Shën Petersburgut deri në Gjermaninë verilindore. Tubacioni i tij binjak, Nord Stream 2, u ndërpre pasi Rusia pushtoi Ukrainën.
Një zëdhënës i Kremlinit, Dmitry Peskov, tha se ishte “jashtëzakonisht i shqetësuar” për rrjedhjet, duke shtuar se mundësia e një sulmi të qëllimshëm nuk mund të përjashtohej.
Sizmologët raportuan shpërthime nënujore përpara se të shfaqeshin rrjedhjet. Komanda e Mbrojtjes e Danimarkës ka publikuar pamjet e rrjedhjeve që tregojnë flluska – më e madhja është 1 km në diametër – në sipërfaqen e Detit Baltik. “Nuk ka dyshim se këto ishin shpërthime.”- tha Bjorn Lund nga Qendra Kombëtare e Sizmologjisë të Suedisë.
