Gjermania planifikon të shpenzojë deri në 200 miliardë euro për të ndihmuar konsumatorët dhe bizneset të përballen me rritjen e çmimeve të energjisë, veçanërisht për gazin natyror.
Kancelari Olaf Scholz tha të enjten se qeveria po riaktivizon një fond stabilizues ekonomik të përdorur më parë gjatë krizës financiare globale dhe pandemisë së koronavirusit.
Fondi do të përdoret për të kufizuar çmimin që klientët paguajnë për gazin, i cili përdoret për ngrohjen e shtëpive, prodhimin e energjisë elektrike dhe fabrikat e energjisë. Një tarifë shtesë e propozuar më parë për gazin që kishte për qëllim të ndihmonte në përhapjen e kostos në rritje të blerjes së karburantit në tregun global po hiqet.
“Dikush mund të thotë se kjo është një goditje e dyfishtë.”– tha Scholz në një konferencë virtuale shtypi, citon AP.
Scholz tha se vendimi i Rusisë për të reduktuar gazin natyror në Evropë dhe rrjedhjet e fundit në dy tubacione treguan se furnizimet e mëtejshme ruse me energji nuk mund të priten në të ardhmen e afërt. “Megjithatë, ne jemi të përgatitur mirë për këtë situatë.”– tha ai. “Ne kemi marrë vendime që na lejojnë të përballemi me këtë situatë të ndryshuar.”
Ministri i Financave, Christian Lindner, këmbënguli se fondi nuk do të kërkonte huamarrje të mëtejshme të rregullta, duke thënë se Gjermania “shprehimisht nuk po ndjek rrugën e Britanisë së Madhe”. Qeveria e Mbretërisë së Bashkuar kohët e fundit njoftoi uljen e taksave të financuara nga huamarrja, pavarësisht planeve për të shpenzuar miliarda për të mbrojtur shtëpitë dhe bizneset nga rritja e çmimeve të energjisë, duke rezultuar në një rënie të mprehtë të paundit.
