Inflacioni në Republikën Çeke u ngjit në nivelin më të lartë të tre dekadave në shtator për kostot e energjisë dhe karburantit, njoftoi shërbimi i statistikave të vendit. Çmimet e konsumit u rritën në 18.0% muajin e kaluar, nga 17.2% në gusht.
“Ky përshpejtim është ndikuar më shumë nga qiratë, çmimet e energjisë dhe karburanteve, të cilat ishin më të larta me gati 50%, nga viti në vit.” – vuri në dukje kreu i Njësisë së Statistikave të Çmimeve të Konsumit të CZSO, Pavla Sediva.
Sipas deklaratës, vetëm në shtator, çmimet e konsumit në dyqanet me pakicë u rritën mesatarisht me gati 1%. Gjatë vitit të tanishëm, rritja e prodhimeve ushqimore bazë ka tejkaluar normën e përgjithshme të inflacionit. Kostoja e miellit të grurit u rrit me pothuajse 70% nga viti i shkuar, vajrat dhe yndyrat me më shumë se 50%, qumështi dhe sheqeri me rreth 50%.
Të shtunën u zhvillua një tubim i madhe në sheshin ‘Ëenceslas’ të Pragës, mijëra njerëz u mblodhën për të protestuar kundër rritjes së çmimeve, rënies së standardeve të jetesës dhe masave të pamjaftueshme të qeverisë në krizën e tanishme.
Evropa po përpiqet të përballet me një krizë të vazhdueshme të energjisë, e shkaktuar pjesërisht nga fushata e BE-së për të hequr dorë nga eksportet ruse të energjisë.
Çmimet e gazit u rritën pasi Rusia sulmoi Ukrainën në fund të shkurtit 2022. BE-ja dhe vendet e tjera perëndimore vendosën sanksione gjithëpërfshirëse ndaj Moskës dhe filluan të ndërpresin furnizimet ruse me energji. Çmimet e gazit kanë arritur në nivele rekord, duke çuar në një rritje të inflacionit.
