Presidenti i SHBA-së Joe Biden pranoi se ai mund të ‘vdesë nesër’ ndërsa përpiqet të sigurojë votuesit amerikanë se ai ka ende energji të mjaftueshme për të kandiduar sërish për postin në vitin 2024. Komentet e tij vijnë mes shqetësimeve të përhapura rreth gjoja përkeqësimit të shëndetit të tij dhe gafave të rregullta.
Në një video nga një intervistë me MSNBC të publikuar të dielën, Biden, 79 vjeç, u pyet se çfarë do t’u thoshte amerikanëve që nuk ishin të sigurt nëse ai duhej të rizgjedhet pavarësisht moshës së tij të shtyrë.
“Unë mendoj se është një gjë legjitime të shqetësohesh për moshën e dikujt, përfshirë edhe timen.” – u përgjigj ai, duke e përshkruar veten si ‘një respektues i madh i fatit’.
“Unë mund të sëmurem nesër. Mund të vdes nesër.” – shtoi ai.
Megjithatë, Biden vazhdoi të thotë se mënyra më e mirë për të gjykuar për shëndetin e tij është ta shikosh atë. Në fillim të këtij muaji, sekretarja e shtypit e Shtëpisë së Bardhë Karine Jean-Pierre konfirmoi se Biden synon të kandidojë për rizgjedhje në vitin 2024.
Megjithatë, në korrik, Neë York Times raportoi, duke cituar burime, se mosha e tij po bëhet gjithnjë e më shumë një problem për administratën e tij . Zyrtarët e intervistuar nga gazeta pranuan se ‘niveli i energjisë’ i liderit amerikan nuk është ai që ishte dikur dhe se ata ‘kujdesen në heshtje’ për të.
Shqetësimet e tyre mbështeten më tej nga gafat e përsëritura nga ana e presidentit. Javën e kaluar, një video u bë virale në mediat sociale që tregonte se Biden duket i hutuar ndërsa përpiqej të gjente daljen nga skena në një tubim në Pittsburgh, Pensilvani.
