Udhëheqësit e Gjermanisë e Francës thuhet se kanë arritur një konsensus se BE-ja do duhet të hakmerret kundër SHBA-së nëse ajo shkon përpara me uljet e planifikuara të taksave dhe përfitimet e energjisë, që synojnë të nxisë firmat të zhvendosin prodhimin atje.
Faqja e lajmeve Politico pretendoi të enjten se kancelari Olaf Scholz dhe presidenti Emmanuel Macron janë të dy të shqetësuar për Aktin e Reduktimit të Inflacionit të Shtëpisë së Bardhë, të cilin ata e konsiderojnë ‘proteksionist’.
Çështja thuhet se është diskutuar në drekën e tyre në Paris një ditë më parë. Sipas gazetës, duke cituar ‘njerëz të njohur me diskutimet e tyre’, të dy udhëheqësit ranë dakord që plani i subvencionimit shtetëror të shpallur nga SHBA-ja do përbënte konkurrencë të pandershme dhe nuk duhet të mbetet pa përgjigje.
Politico vuri në dukje se marrëveshja e tyre erdhi pavarësisht dallimeve të opinioneve midis Scholz dhe Macron për çështje të tjera kryesore, duke përfshirë energjinë dhe mbrojtjen.
Për të kundërshtuar planet e Uashingtonit, Parisi dhe Berlini thuhet se ranë dakord të propozojnë skema të ngjashme nxitëse në mbarë BE-në për bizneset.
Megjithatë, nëse zbatohet, masa do rrezikonte të ndizte një luftë tregtare midis bllokut dhe SHBA-së, pretendonte artikulli.
Duke u shfaqur në kanalin televiziv France 2 të mërkurën mbrëma, Macron theksoi se BE-ja duhet ‘të rezervojë subvencionet tona për prodhuesit tanë evropianë’.
Megjithatë, dy fuqitë evropiane nuk planifikojnë të hyjnë ende në modalitetin e përplasjes, sipas Politico dhe do parapëlqenin të bënin një marrëveshje me SHBA-në në tryezën e bisedimeve.
Sipas artikullit, kjo mund të bëhet përmes ‘Taskforcës BE-SHBA për Aktin e Reduktimit të Inflacionit’ që u krijua të martën gjatë një takimi midis Presidentes së Komisionit Evropian Ursula von der Leyen dhe Zëvendës Këshilltarit të Sigurisë Kombëtare të SHBA, Mike Pyle.
