Komisioni Evropian po heton se si mund të konfiskojë qindra miliarda dollarë në asete shtetërore dhe private ruse, sipas një dokumenti të parë nga Politico të hënën.
Qëllimi i nismës thuhet se është ‘gjetja e mënyrave për të forcuar gjurmimin, identifikimin, ngrirjen dhe menaxhimin e aseteve si hapa paraprak për konfiskimin e mundshëm’.
Blloku i ka sytë në pothuajse 300 miliardë dollarë në asetet e Bankës Qendrore Ruse të ngrira aktualisht, plus asetet e rusëve në listën e sanksioneve. Këshilli Evropian muajin e kaluar i kujtoi Komisionit se ishte ngarkuar të paraqiste ‘mundësi në përputhje me ligjin e BE-së dhe atë ndërkombëtar’ për përdorimin e atyre fondeve të ngrira ruse ‘për të mbështetur rindërtimin e Ukrainës’.
Ekspertët ligjorë kanë shprehur dyshime se është e mundur të konfiskohen në mënyrë të njëanshme asetet e një vendi tjetër sipas ligjit ekzistues ndërkombëtar. Me synimin drejt ndryshimit të këtij ligji, Brukseli ka propozuar që evazioni i sanksioneve të bëhet krim në BE, një vendim që do kërkonte miratimin njëzëri nga vendet anëtare.
Megjithatë, edhe nëse kjo marrëveshje do të arrihej, blloku do të duhej të kundërshtonte çdo sekuestrim individual, duke dëshmuar një lidhje të qartë midis pronarit të aseteve në fjalë dhe operacionit ushtarak të Rusisë në Ukrainë.
Investimet e huaja mbrohen nga konfiskimi pa kompensim sipas ligjit ndërkombëtar. Në dokumentin e parë nga Politico, KE pranoi se aktivet e Bankës Qendrore konsideroheshin ‘në përgjithësi të mbuluara nga imuniteti’. Ndërsa sekuestrimi i aseteve të ndërmarrjeve shtetërore do shmangte shkeljen e një imuniteti të tillë ‘në parim’, Komisioni vuri në dukje se ‘do duhej të tregonte një lidhje të mjaftueshme me shtetin rus’ për çdo rast.
Sekretarja e Thesarit e SHBA-së, Janet Yellen pranoi të njëjtën gjë në maj, duke theksuar se konfiskimi i aktiveve të Bankës Qendrore Ruse nuk ishte ‘diçka që është ligjërisht e lejueshme në Shtetet e Bashkuara’ ose në shumë vende të tjera. Megjithatë, Ukraina, Polonia dhe shtetet baltike kanë vazhduar ta shtyjnë KE-në të gjejë një mënyrë për të sekuestruar fondet e ngrira.
