Një gjykatë franceze ka përcaktuar se një punonjës nuk mund të pushohet nga puna thjesht sepse nuk dëshiron të argëtohet dhe nuk ka dëshirë të marrë pjesë në aktivitetet e grupit që përfshijnë ‘alkoolizëm të tepruar e argëtime të tjera.
Vendimi u dha nga Gjykata e Kasacionit e Parisit më 9 nëntor, por u raportua vetëm këtë javë. Beteja ligjore përfshiu një punonjës të paidentifikuar të njohur si Z.T. dhe ‘Cubik Partners’, një kompani konsulence dhe trajnimi menaxhimi që promovon qasjen e saj ‘argëtuese’.
Paditësi u punësua në vitin 2011 dhe u rrit në detyrë tre vjet më vonë. Pavarësisht kësaj, z. T. me sa duket kishte vështirësi në përqafimin e kulturës së korporatës, pasi Cubik Partners e pushoi atë në 2015 për ‘papërshtatshmëri profesionale’, duke thënë se ai nuk arriti të kultivonte atmosferën e kompanisë.
Kjo përfshinte pjesëmarrjen ‘në seminare dhe pijet e fundjavës që shpesh përfundojnë në konsumim të tepruar të alkoolit’, sipas vendimit të gjykatës.
‘Ngjarjet argëtuese’ u përkthyen gjithashtu në ‘praktika poshtëruese dhe ndërhyrëse në lidhje me privatësinë’, duke përfshirë akte seksuale të simuluara, detyrimin për të ndarë shtratin me një kolege gjatë seminareve, përdorimin e pseudonimeve për të thirrur njerëzit dhe varjen e fotografive të deformuara e të sajuara në zyra.
Megjithatë, z. T argumentoi se ai ka të drejtë të ‘kundërshtojë politikën e kompanisë bazuar në nxitjen për të marrë pjesë në teprime të ndryshme’. Gjykata mbështeti linjën e tij të të menduarit, duke thënë se praktikat e kompanisë shkelnin ‘të drejtën e tij themelore për dinjitet dhe respekt për jetën private’ dhe se ai po ushtronte ‘lirinë e tij të shprehjes’.
Si rezultat, Gjykata e Kasacionit vendosi që kompania duhet t’i paguajë paditësit 3,000 euro, ndërsa vendimi nëse ai ka të drejtë për një pagesë prej 461,000 eurosh si dëmshpërblim do merret më vonë.
