Kryekëshilltari mjekësor në largim i Shtëpisë së Bardhë, Dr. Anthony Fauci, ka kritikuar Kinën për refuzimin e vaksinave perëndimore, ndërsa vazhdon të vendosë bllokime për qytetarët e saj lidhur me koronavirusin e ri. Pekini argumenton se strategjia e tij ka çuar në një numër më të ulët të vdekjeve.
“Qasja e tyre ka qenë shumë, shumë e ashpër e drakoniane për sa i përkey mbylljeve pa një qëllim të dukshëm.” – tha Fauci në një intervistë për NBC News.
81-vjeçari Fauci, i cili planifikon të tërhiqet deri në fund të muajit të ardhshëm, udhëhoqi përgjigjen e SHBA-së gjatë pandemisë, e shënuar nga përplasje për çështje si efikasiteti i maskave dhe objektivat e imunitetit të tufës. Ai kritikoi politikat ‘Zero Covid’ të Kinës, pavarësisht se më parë vlerësoi qasje të ngjashme zbutëse të tolerancës zero në Australi dhe Zelandën e Re.
Protestat masive kundër bllokimit tronditën disa qytete kineze, përfshirë Shangain, Ëuhanin dhe Pekinin gjatë fundjavës, të shkaktuara nga një zjarr vdekjeprurës në një bllok apartamentesh në Urumqi, me protestuesit që fajësuan kufizimet e Covid për pengimin e përpjekjeve të shpëtimit.
Ministria e Jashtme e Kinës deklaroi këtë verë se ‘politika dinamike zero-Covid’ nuk ka për qëllim infeksionin zero. Përkundrazi, ‘ajo synon të kontrollojë përhapjen e virusit me koston më të ulët të mundshme në kohën më të shkurtër të mundshme’.
Sipas shifrave zyrtare, Kina ka regjistruar 9.5 milionë infeksione dhe 30,000 vdekje, ndërsa SHBA ka numëruar më shumë se 97 milionë raste dhe afro 1.1 milion vdekje.
Fauci tha se Pekini bëri një gabim duke hedhur poshtë marrjen e vaksinave perëndimore ‘shumë efektive, 94-95% efektive’ dhe duke u mbështetur në vaksinat e zhvilluara në vend, të cilat ai pretendoi se ishin inferiore ndaj vaksinave të përdorura kudo në botë. Megjithatë, pavarësisht se u vaksinua plotësisht dhe mori edhe një dozë përforcuese, vetë Fauci u prek nga virusi dy herë.
Zyrtari polemizues i shëndetësisë akuzoi gjithashtu autoritetet kineze se sillen në një ‘mënyrë të dyshimtë, jotransparente’ gjatë shpërthimeve të sëmundjeve, ‘edhe kur nuk ka asgjë për të fshehur’. Sidoqoftë, vetë Fauci më herët pranoi se gënjeu publikun amerikan në mënyrë që të ‘nxiste’ normat e vaksinimit.
