Rusia thotë se refuzimi i Perëndimit për të njohur “territoret e reja” të marra nga Ukraina i bën bisedimet e paqes më të vështira.
Ky reagim vjen pasi presidenti Joe Biden tha se do të ishte gati të takonte Vladimir Putin.
Si përgjigje Kremlini tha se ishte i hapur për negociata, por jo me kërkesën e Perëndimit për t’u tërhequr nga Ukraina, shkruan BBC.
Zëdhënësi Dmitry Peskov u tha gazetarëve më herët se Putin mbetet i hapur për bisedime që synojnë “të garantojnë interesat tona”. Por Moska sigurisht nuk ishte gati të pranonte kushtet e SHBA-së: “Çfarë tha në fakt Presidenti Biden? Ai tha se negociatat janë të mundshme vetëm pasi Putin të largohet nga Ukraina.”
Rusia aneksoi ilegalisht katër rajone të Ukrainës në fund të shtatorit. Ndërkohë nëntë muaj pas pushtimit, ka humbur më shumë se gjysmën e tokës që kapi.
Presidenti Biden u tha gazetarëve të enjten mbrëma se ai ishte i gatshëm të takonte liderin rus “nëse në fakt ka një interes te ai që të vendosë se po kërkon një mënyrë për t’i dhënë fund luftës”.
Duke qëndruar pranë tij në Shtëpinë e Bardhë, Emmanuel Macron i Francës e bëri të qartë se të dy burrat kishin rënë dakord se kurrë nuk do t’i nxisin ukrainasit të bëjnë një kompromis “që nuk do të jetë i pranueshëm për ta”.
Stuhia e dukshme e aktivitetit diplomatik pasoi muaj me pak shenja entuziazmi për bisedime. Ushtria ruse është detyruar të tërhiqet në Ukrainën jugore, ndërkohë që ka nisur sulme të gjera në infrastrukturën civile.
Të premten, kancelari gjerman Olaf Scholz foli me Presidentin Putin për herë të parë që nga shtatori. Gjatë telefonatës një orëshe, Berlini tha se udhëheqësi gjerman i kishte kërkuar homologut të tij të gjente një zgjidhje diplomatike që përfshinte tërheqjen e trupave ruse nga Ukraina “sa më shpejt të jetë e mundur”.
Përpara telefonatës Scholz-Putin të së premtes, ministri i jashtëm rus Sergei Lavrov u ankua se vendet evropiane nuk kishin ofruar asgjë konkrete deri më tani për sa i përket ndërmjetësimit.
“Meqë ra fjala, Macron ka deklaruar rregullisht gjatë dy javëve të fundit se po planifikonte një bisedë me presidentin rus”, citohet të ketë thënë ai, ndërsa shtoi se Rusia nuk kishte pasur asnjë sinjal përmes kanaleve diplomatike.
Lavrov emëroi ish-Sekretarin e Shtetit të SHBA-së, John Kerry, si llojin e figurës që në të kaluarën kishte qenë në gjendje të zgjidhte problemet dhe të përfshihej në dialog të vërtetë.
Ministri i Jashtëm italian Antonio Tajani tha të premten se kishte ardhur koha për të punuar për një paqe të drejtë për Ukrainën, por ajo duhej të vinte përmes pavarësisë së Kievit dhe jo dorëzimit të tij. “Kremlini tani duhet të japë sinjale konkrete në vend që të bombardojë popullsinë.”- tha ai për gazetën La Repubblica.
