Një gjykatës federal i Uashingtonit ka rrëzuar një padi kundër princit të kurorës të Arabisë Saudite, Mohammed bin Salman, për përfshirjen e tij të dyshuar në vrasjen e gazetarit Jamal Khashoggi. Në një vendim të martën, gjykata vendosi që princi kishte të drejtën e imunitetit si kreu i një shteti të huaj.
Në një vendim prej 25 faqesh, gjykatësi John Bates pranoi, megjithatë, se ai ngurronte të hidhte poshtë padinë e ngritur nga e fejuari e Khashoggit pasi përmbante ‘akuza të besueshme’ kundër princit.
Gjykatësi shpjegoi se ai nuk kishte zgjidhje tjetër veçse të pushonte çështjen pasi duart e tij ishin në thelb të lidhura pasi princi i kurorës u emërua kryeministër i Arabisë Saudite dhe presidenti amerikan Joe Biden i dha atij imunitet sovran në një dosje gjyqësore të dorëzuar muajin e kaluar.
Princi Mohammed u emërua kreu i shtetit saudit në shtator me dekret mbretëror nga babai i tij Mbreti Salman, pothuajse katër vjet pasi Khashoggi u vra brutalisht dhe u copëtua nga agjentët sauditë në konsullatën saudite në Stamboll, Turqi. Shërbimet e inteligjencës amerikane pretenduan se vrasja ishte urdhëruar personalisht nga princi, i cili kishte qenë tashmë sundimtar ‘de facto’ i mbretërisë prej disa vitesh.
Princi ka pranuar se vrasja ka ndodhur ‘teksa ai drejtonte vendin’, por ka mohuar të ketë ndonjë përfshirje, duke urdhëruar apo miratuar atë. Në vitin 2020, një gjykatë saudite burgosi tetë persona për vrasjen, duke i dënuar me nga shtatë deri në 20 vjet burg.
Khashoggi ishte një gazetar dhe aktivist me qendër në Shtetet e Bashkuara. Një kritik i ashpër i qeverisë saudite, ai kishte shkruar shkrime të shumta të ashpra kundër princit dhe familjes e tij në Washington Post.
Vrasja e tij çoi në një tendosje të konsiderueshme në marrëdhëniet SHBA-Arabi Saudite. Megjithëse administrata e Biden më vonë deklasifikoi raportin e CIA-s për vrasjen, ai u kritikua përfundimisht për ‘kapitullim’ ndaj qeverisë saudite pasi ai nuk vendosi asnjë sanksion kundër princit dhe u fotografua duke u takuar me të gjatë një vizite në mbretëri në korrik.
