Algoritmi i Facebook akuzohet se ndihmoi në nxitjen e përhapjes virale të urrejtjes dhe dhunës gjatë luftës civile në Etiopi.
Padia është ngritur nga Abrham Meareg, djali i një akademiku etiopian që u qëllua për vdekje pasi u sulmua nëpër postime në Facebook. Kjo ngjarje bëri që të ngrihet një padi kundër kompanisë “Meta”, pjesë e të cilës është edhe rrjeti social.
Paditësit kërkojnë një fond prej 2 miliardë dollarësh për viktimat e urrejtjes në Facebook dhe ndryshime në algoritmin e platformës.
Meta tha se investoi shumë në moderim dhe teknologji për të hequr urrejtjen. Një përfaqësues i kompanisë tha se gjuha e urrejtjes dhe nxitja e dhunës ishin kundër rregullave të platformës.
“Puna jonë për sigurinë dhe integritetin në Etiopi udhëhiqet nga reagimet nga organizatat lokale të shoqërisë civile dhe institucionet ndërkombëtare.“- tha përfaqësuesi sipas BBC-së.
Çështja e paraqitur në Gjykatën e Lartë të Kenias, mbështetet nga grupi i fushatës Foxglove. Meta ka një qendër moderimi të përmbajtjes në kryeqytetin kenian, Nairobi.
Qindra mijëra njerëz kanë vdekur në konfliktin midis qeverisë etiopiane dhe forcave në rajonin verior të Tigray, me 400 mijë të tjerë që jetojnë në kushte të ngjashme me urinë.
Muajin e kaluar, u ra dakord për një marrëveshje të papritur paqeje – por kohët e fundit, ka pasur një rritje të vrasjeve me motive etnike midis komuniteteve Amhara dhe Oromo-folëse.
Abrham Meareg
Vitin e kaluar babai i Abrham Meareg u bë një nga viktimat e dhunës në vend. Më 3 nëntor 2021, Profesori Meareg Amare Abrha u ndoq nga universiteti i tij deri në shtëpi nga njerëz të armatosur me motoçikleta dhe u qëllua nga një distancë e afërt, kur përpiqej të futej në banesë.
I biri pretendon se kërcënimet nga sulmuesit e tij penguan dëshmitarët që t’i vinin në ndihmë teksa ai shtrihej i gjakosur. Ai vdiq i shtrirë në tokë shtatë orë më vonë.
Para sulmit, djali i tij thotë se postimet në Facebook shpifnin dhe zbulonin informacione identifikuese për të.
Pavarësisht ankesave të përsëritura, platforma “i la këto postime derisa ishte shumë vonë”. Njëri postim u hoq pas vrasjes së babait të tij. Një tjetër, të cilin platforma ishte zotuar ta hiqte, mbeti në internet që nga 8 dhjetori 2022.
“Nëse Facebook do të kishte ndaluar përhapjen e urrejtjes dhe postimeve të moderuara siç duhet, babai im do të ishte ende gjallë.”- tha Meareg. Ai thotë se do të sigurohet që asnjë familje të mos vuante siç kishte vuajtur familja e tij, si dhe “një ndjesë personale” nga Meta.
