Administrata e presidentit amerikan Joe Biden po përmbyll planet për të dërguar raketa ‘Patriot’ në Ukrainë, raportoi CNN të martën. Kievi i ka kërkuar prej muajsh sistemet amerikane të mbrojtjes ajrore, teksa Rusia vazhdon sulmet e saj ndaj objektivave ushtarake dhe infrastrukturës ukrainase.
Plani është në fazat e tij përfundimtare dhe ka nevojë për miratim nga Sekretari i Mbrojtjes Lloyd Austin përpara se të dërgohet në tryezën e Biden për nënshkrimin e tij, thuhet në raport, duke cituar tre zyrtarë anonimë amerikanë. Austin pritet ta miratojë vendimin e njoftimi pritet të bëhet brenda kësaj jave, thanë zyrtarët për CNN.
Një bateri e vetme e raketave ‘Patriot’ përfshin një njësi fuqie, një stacion komandimi, një njësi radar dhe antena, dhe deri në tetë lëshues të montuar në kamion, secili që mban katër raketa tokë-ajër. I zhvilluar nga kontraktori amerikan i mbrojtjes ‘Raytheon’, sistemi ka një rreze veprimi deri në 99 milje (160 km) dhe mund të përgjojë raketat ose avionët.
Sistemi ‘Patriot’ u testua gjerësisht gjatë Luftës së Gjirit, me Pentagonin që pretendon se ka kapur me sukses 45 nga 47 raketa irakiane ‘Scud’ gjatë konfliktit gjashtëjavor. Megjithatë, ushtria izraelite më vonë zbuloi se ‘një ose ndoshta asnjë’ nga raketat ‘Scud’ u kapën në të vërtetë, ndërsa një raport i New York Times i vitit 2017 e gjeti sistemin ‘Patriot’ të paefektshëm kur u përdor nga Arabia Saudite kundër raketave Houthi të lëshuara nga Jemeni.
Është e paqartë se sa sisteme ‘Patriot’ do dërgojnë SHBA-të në Ukrainë. CNN shkroi se bateritë e raketave fillimisht do shkojnë në një bazë të ushtrisë amerikane në Grafenwoehr, Gjermani, ku ekuipazhet ukrainase do stërviten për t’i përdorur ato. Rrjeti gjithashtu vuri në dukje se stërvitja në platformën Patriot zakonisht zgjat ‘shumë muaj’.
SHBA ka dërguar tashmë sisteme anti-ajrore NASAMS me rreze të shkurtër veprimi në Ukrainë, por Kievi ka kërkuar në mënyrë specifike bateri ‘Patriot’ që nga tetori, kur Rusia filloi të godasë vazhdimisht objektivat e komandës ushtarake ukrainase dhe rrjetit të energjisë në përgjigje të sulmeve të Ukrainës në infrastrukturën e saj, duke përfshirë Urën e Krimesë.
