Lufta në Ukrainë dhe moti ekstrem kanë rritur kostot e risigurimeve deri në 200 për qind gjatë rinovime të rëndësishme të bëra në muajin janar, sipas një raporti të ri.
Kjo gjë shton mundësinë e rritjes së primeve dhe të reduktimit të asaj që siguruesit janë të gatshëm të mbulojnë.
Data 1 janar është dita e rinovimit të policës për risiguruesit, të cilët ndajnë humbjet me siguruesit kryesorë, duke luajtur kështu një rol jetik në atë që mund të sigurohet dhe çmimin e sigurimeve.
Ri-negocimi i policave të risigurimit të këtij viti ka qenë më sfiduesi i viteve të fundit, pasi risiguruesit po i përgjigjen presionit nga inflacioni i lartë dhe nga humbjet e mëdha si pasojë e katastrofave natyrore, si dhe nga pushtimi rus i Ukrainës.
James Kent, drejtuesi ekzekutiv global në agjencinë e ndërmjetësimit të risigurimeve Gallagher Re, e cila publikoi raportin të martën, e përshkroi periudhën e rinovimit të policave të risigurimit si “shumë të vonë, komplekse dhe në shumë raste, frustruese”.
Kostoja e risigurimit për industrinë e aviacionit u rrit nga 150 për qind në 200 për qind, pasi risiguruesit ndryshuan çmimet për të rivlerësuar humbjet e kaluara, si dhe për shkak të pagesave të pritshme nga avionët e bllokuar dhe betejave ligjore me kompanitë e leasing-ut si pasojë e luftës së Rusisë në Ukrainë.
Risigurimi i pasurive të paluajtshme nga katastrofat, i cili ka pasur shumë humbje për shkak të uraganeve dhe fatkeqësive të tjera natyrore, pësoi gjithashtu rritje, pasi normat në SHBA u rritën me 45 deri në 100 për qind për policat e risigurimit që janë prekur nga humbjet, sipas shifrave të Gallagher Re. Agjencia e ndërmjetësimit e lidh këtë rritje me ndikimin e uraganit Ian, i cili goditi Floridën dhe Karolinën e Jugut vitin e kaluar, si dhe me kërcënimin nga inflacioni.
“Për pasuritë e paluajtshme, ky është viti që agjencitë e risigurimit kanë marrë kontrollin e situatës dhe kanë qenë shumë të vendosura,” tha për Financial Times kryetari ndërkombëtar i Gallagher Re, James Vickers. Ai i përshkroi negociatat e risigurimeve si ” më të ashprat që nga 11 shtatori”.
Në një raport të botuar gjithashtu të martën, agjencia e ndërmjetësimit Howden tha se kostoja e risigurimit të pasurive të paluajtshme nga katastrofat ishte rritur me 37 për qind globalisht në rinovimet e janarit, rritja më e madhe në të dhënat e krahasueshme që nga viti 1992. Howden e quajti këtë si “një nga situatat më të vështira në tregun e risigurimeve që mbahet mend ndonjëherë”.
Çmimet më të larta të risigurimeve dhe reduktimi i mbulimeve nga risugurimet zakonisht reflektohen te çmimet që vendosin siguruesit dhe te mbulimi që ata janë të gatshëm të ofrojnë. Rritja e çmimeve të risigurimeve pritet të nxisë akoma më tej atë që ka qenë një rritje e konsiderueshme e çmimeve të sigurimeve për kompanitë për disa vite radhazi.
VINI RE: Artikulli është pronë intelektuale e Revista Monitor
