Arrestimi i djalit të El Chapo-s, kreut të kartelit meksikan të drogës Sinaloa ka ndezur rrëmujë e koas në shtetin perëndimor të Meksikës, me bandat kriminale të armatosura rëndë që u përfshinë në përleshje me ushtrinë, ndërsa makinat e djegura u panë në rrugët e Culiacan.
Trazirat civile, plaçkitjet dhe madje një trazirë në burg kanë shpërthyer gjithashtu në qytet, i cili tani i ngjan një zone lufte.
Kapja e Ovidio ‘El Raton’ Guzman-Lopez në një bastisje ushtarake të enjten në mëngjes shkaktoi përleshje me forcat e sigurisë, duke e zhytur qytetin e Culiacan – shtëpia e kartelit të drogës Sinaloa – në kaos.
Guvernatori i shtetit Sinaloa, Ruben Rocha Moya, ka raportuar të paktën gjashtë të vdekur në luftime deri më tani, si dhe 29 persona të plagosur, duke përfshirë tetë civilë dhe 21 oficerë policie. Ai u ka bërë thirrje qytetarëve që të mos dalin në rrugë.
Pamjet dramatike që pretendojnë të tregojnë trazirat kanë qarkulluar në internet, ku një militant i kartelit shihet duke gjuajtur atë që duket të jetë një pushkë Barrett e kalibrit .50 ndaj një aeroplani qeveritar lart.
Zyrtarët meksikanë kanë thënë se Barrett është e parapëlqyer në mesin e grupeve kriminale, duke pasur parasysh aftësinë e tij për të shpuar sipërfaqe të blinduara, mure betoni dhe madje edhe automjete të blinduara ushtarake.
Videot tregojnë gjithashtu një numër të madh makinash të djegura të parkuara pranë ‘narko bllokadave’ të kartelit rreth Culiacan, si dhe mbetjet e djegura të një autobusi të transportit publik.
Sipas guvernatorit Moya, rreth 250 automjete janë raportuar të vjedhura në qytet. Të shtëna të forta armësh mund të dëgjoheshin në disa video, ku civilët shiheshin duke u ulur për t’u mbuluar në një rrugë ndërsa zhurmat e luftimeve kumbojnë në largësi.
Raportet e medias kanë vënë në dukje gjithashtu raste të plaçkitjeve dhe trazirave në Culiacan, duke përfshirë një përpjekje masive arratisjeje nga të dënuarit në burgun Aguaruto.
Të shtënat me armë rreth aeroportit Culiacan ndërprenë gjithashtu fluturimet, me një avion të nisur për në Mexico City që u godit nga një plumb të enjten pasdite, duke bërë që pasagjerët dhe ekuipazhi të fshihen. Ndërsa nuk pati të lënduar, ‘Aeromexico’ vendosi të ndalojë përkohësisht fluturimet në mes të trazirave.
Djali i bosit famëkeq të drogës Sinaloa i njohur si ‘El Chapo’, Guzman-Lopez u arrestua më parë nga autoritetet meksikane në vitin 2019, por më vonë u lirua pas betejave të rënda me armë me kartelin, që ngjasojnë me rrëmujën e djeshme.
Bastisja e së enjtes u mbështet nga trupat e Ushtrisë Meksikane, Marinës, Gardës Kombëtare, si dhe policisë vendase, me shërbimet e sigurisë që thanë se operacioni erdhi pas gjashtë muajsh mbikëqyrjeje e planifikimi.
