Qeveria talebane e Afganistanit ka nënshkruar një marrëveshje për nxjerrjen e naftës me një kompani kineze, raportoi Bloomberg të premten.
Kontrata me Kompaninë e Naftës dhe Gazit të Azisë Qendrore Xinjiang (CAPEIC) u nënshkrua në Kabul në praninë e zëvendëskryeministrit të talebanëve për Çështjet Ekonomike, Mullah Abdul Ghani Baradar dhe ambasadorit kinez në Afganistan, Wang Yu, tha gazeta, duke cituar një deklaratë nga qeveria talebane.
Marrëveshja 25-vjeçare e nxjerrjes së naftës parashikon shpime për naftë në pellgun e Amu Darya. Kjo është marrëveshja e parë e madhe ndërkombëtare e talebanëve për nxjerrjen e energjisë që kur grupi mori kontrollin e vendit në vitin 2021.
“Për sa i përket burimeve natyrore, Afganistani është një komb i pasur. Përveç mineraleve të tjera, nafta është pasuria e popullit afgan, mbi të cilën mund të mbështetet ekonomia e vendit.” – citon Bloomberg të ketë thënë Baradar.
Kompania kineze do investojë deri në 150 milionë dollarë në vit, e cila do rritet në 540 milionë dollarë në tre vjet dhe do u japë punë 3,000 afganëve, shtoi gazeta.
Afganistani vlerësohet të ketë më shumë se 1 trilion dollarë burime natyrore si gazi natyror, nafta, bakri dhe minerale të rralla, të cilat janë kryesisht të pashfrytëzuara për shkak të dekadave të trazirave.
Pasi talebanët erdhën në pushtet në vitin 2021, SHBA ngriu më shumë se 7 miliardë dollarë të rezervave të saj valutore, duke e lënë vendin në mungesë të parave. Kina, e cila ndan një kufi 76 kilometra me Afganistanin, tha në atë kohë se ishte e gatshme të thellonte marrëdhëniet ‘miqësore dhe bashkëpunuese’ me Afganistanin.
