Irani ekzekuton britaniko-iranianin Alireza Akbari, i dënuar me vdekje.
Familjes së Akbarit iu kërkua të shkonte në burgun e tij për një “vizitë përfundimtare” të mërkurën dhe gruaja e tij tha se ai ishte transferuar në izolim.
Ish-zëvendësministri i mbrojtjes iranian u arrestua në vitin 2019 dhe u dënua për spiunazh për Britaninë e Madhe, të cilën ai e mohoi.
Kryeministri i Mbretërisë së Bashkuar Rishi Sunak tha se ekzekutimi ishte një “akt i pashpirt dhe frikacak, i kryer nga një regjim barbar”, raporton BBC.
Sundimtarët e Iranit “nuk kishin respekt për të drejtat e njeriut të popullit të tyre”, tha Sunak, duke shtuar se mendimet e tij ishin “me miqtë dhe familjen e Alirezës”.
Sekretari i Jashtëm i Mbretërisë së Bashkuar, James Cleverly, tha se ekzekutimi “nuk do të qëndronte i pakundërshtuar”.
Gazeta zyrtare e lajmeve e gjyqësorit iranian Mizan raportoi të shtunën se Alireza Akbari ishte varur, pa specifikuar datën kur ndodhi ekzekutimi.
Lajmi erdhi pasi Irani postoi një video të Akbarit në fillim të kësaj jave që tregonte atë që dukej si rrëfime të detyruara, dhe pasi ministria e inteligjencës e vendit e kishte përshkruar britaniko-iranianin si “një nga agjentët më të rëndësishëm të shërbimit inteligjent britanik në Iran”. .
