Pentagoni njoftoi të premten në mbrëmje se një tjetër balonë spiune kineze ishte identifikuar dhe po fluturonte mbi Amerikën Latine.
“Ne po shohim raporte të një balone që kalon tranzit në Amerikën Latine. Tani vlerësojmë se është një tjetër balonë mbikëqyrëse kineze.” – tha zëdhënësi i Pentagonit, Gjeneral Brigade Pat Ryder.
Kjo shënon balonën e dytë të dyshuar spiune kineze të gjetur pasi e para u zbulua duke lundruar mbi Shtetet e Bashkuara të enjten.
Ryder tha të enjten:
“Qeveria e SHBA-së, përfshirë NORAD, vazhdon ta gjurmojë dhe mbikëqyrë nga afër rastin. Balona po udhëton në një lartësi mbi trafikun ajror e zakonshëm dhe nuk paraqet kërcënim ushtarak apo fizik për njerëzit në tokë. Raste të këtij lloji të aktivitetit të balonave janë vërejtur më parë gjatë disa viteve të fundit.”
Megjithatë, një zëdhënës i Ministrisë së Jashtme kineze pohoi se balona është një ‘mjet civil i përdorur për qëllime kërkimore, kryesisht meteorologjike’.
Është e paqartë se ku në Amerikën Latine u zbulua balona e dytë, por zyrtarët amerikanë i thanë CNN-it se balona e dytë nuk duket të jetë drejtuar drejt vendit.
Zyrtarët e Shteteve të Bashkuara i kërkuan presidentit Joe Biden të rrëzojë balonën e parë të gjetur duke fluturuar mbi hapësirën ajrore amerikane.
Megjithatë, Pentagoni të premten hodhi poshtë thirrjet për të rrëzuar balonën, duke argumentuar se ‘rënia mund të çonte në dëmtime civile, vdekje ose dëmtime të konsiderueshme pronësore’.
