Majtas Santiago Malko, në mes Ervis Martinaj, djathtas Leonard Duka
Leonard Duka, kreu i klanit ‘Duka’, kundërshtar i Ervis Martinajt, është arrestuar në Belgjikë.
37-vjeçari është arrestuar në Belgjikë pas bashkëpunimit të policisë shqiptare me atë belge dhe pritet të ekstradohet drejt Shqipërisë. Duka dyshohet për ekzekutimin e Santiago Malkos, ngjarje e ndodhur në rrugën ‘Xhanfize Keko’ në Tiranë më 27 gusht 2019.
Duka ishte shpallur në kërkim nga Interpol Tirana, me kërkesë të Gjykatës së Posaçme, që i ka caktuar masën arrest me burg lidhur me ngjarjen e lartpërmendur.
Njoftimi
“Policia e Shtetit/Vijon bashkëpunimi me homologët, për kapjen dhe arrestimin me qëllim ekstradimin, të shtetasve të shpallur në kërkim ndërkombëtar.
Finalizohet operacioni policor i koduar “Provinca”.
Operacioni, falë inteligjencës informative të siguruar nga Fast Albanaia, si dhe falë shkëmbimit në kohë të informacionit me homologët e Fast Belgjikës dhe midis ZQK Interpol Tirana e zyrës homologe të Interpol Brukselit.
Kapet nga Fast Belgjika, në një provincë të Brukselit, një shtetas shumë i kërkuar ndërkombëtarisht, për krime kundër personit dhe për armëmbajtje pa leje.
Në vijim të punës për grumbullimin e informacioneve, me qëllim lokalizimin dhe kapjen e shtetasve të shpallur në kërkim ndërkombëtar, falë inteligjencës informative të siguruar nga Fast Albania, për vendodhjen e një të shumëkërkuari që fshihej në një banesë private, në një provincë të Brukselit, menjëherë kanë shkëmbyer informacion me Fast Belgjikën, të cilët në kuadër të operacionit policor të koduar “Provinca“, kapën dhe arrestuan me qëllim ekstradimin shtetasin e shumëkërkuar L. D., 37 vjeç, banues në Tiranë.
Shtetasi L. D. ishte i shpallur ne kërkim ndërkombëtar nga ZQK Interpol Tirana, pasi Gjykata e Posaçme Kundër Korrupsionit dhe Krimit te Organizuar i ka caktuar masën e sigurisë “Arrest në burg”, për kryerjen e veprave penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit luftarak”, të kryera në formën e grupit të strukturuar kriminal.
Ky shtetas dyshohet se është një nga autorët e vrasjes së shtetasit S. M., të ndodhur në gusht të viti 2019, në rrugën “Xhanfize Keko”, Tiranë.”
