Joe Biden po ndjek një politikë të ‘çekut të bardhë’ ndaj Ukrainës, ndërkohë që mbyll një sy ndaj çështjeve më të mprehta në Amerikë, ka thënë Guvernatori i Floridës, Ron DeSantis, duke komentuar vizitën e papritur të presidentit amerikan në Kiev të hënën.
“Ne kemi shumë probleme të grumbulluara këtu në vendin tonë që ai po i anashkalon,” tha DeSantis në Fox News për ‘Fox & Friends’ disa orë pasi lideri amerikan mbërriti në kryeqytetin ukrainas.
“Ai është shumë i shqetësuar për ata kufij shumë larg nesh. Ai nuk ka bërë asgjë për të siguruar kufirin tonë me Meksikën këtu në shtëpi,” tha DeSantis, i cili disa besojnë se po përgatitet të kandidojë për president në vitin 2024. Ai gjithashtu e kritikoi Biden se ‘poshtëroi SHBA-në’ duke lënë balonin ‘spiun’ kinez të fluturojë mbi gjithë territorin e vendit.
Në temën e mbështetjes ushtarake të Amerikës për Ukrainën në mes të konfliktit me Rusinë, guvernatori këmbënguli se administrata Biden ‘i ka dhënë në mënyrë efektive Kievit një çek të bardhë pa asnjë objektiv të qartë strategjik të identifikuar’.
Edhe pse Rusia është ‘armiqësore’ ndaj SHBA-së, ajo nuk paraqet të njëjtin nivel kërcënimi për SHBA-në si Kina, sipas guvernatorit.
DeSantis pritet nga shumë njerëz të jetë rivali kryesor i Donald Trump për nominimin presidencial republikan vitin e ardhshëm.
Gjatë udhëtimit të tij në Kiev, i cili zgjati vetëm pesë orë, Biden siguroi edhe një herë homologun e tij ukrainas, Vladimir Zelensky, për mbështetjen e Uashingtonit dhe premtoi 500 milionë dollarë të tjera ndihmë vdekjeprurëse për qeverinë e tij.
