Kryeministri Edi Rama, pasi përfundimit të mbledhjes së Kryesisë së PS-së tha se forca e tij politike po vijon punën për listën e kandidatëve për zgjedhjet lokale të 14 majit.
Kreu i PS-së tha se zyrtarizimi do të bëhet para se të regjistrohen kandidatët në KQZ.
“Pak a shumë po. Aty ku faktikisht ka pasur dakordësi dhe si të thuash sinkronizmin rreth kandidatëve të caktuar që janë aktualisht kryetar bashkie, ka vazhduar procesi. Zyrtarizimi do bëhet para se kandidatët të regjistrohen zyrtarisht. Jemi në linja të përgjithshme, e dimë se cila do jetë skuadra jonë.”, tha Rama.
Rama tha se nuk i ndan kryebashkiakët aktualë në të mirë e të këqinj, ndërsa shtoi se do japë një parashikim mbi rezultatin e zgjedhjeve siç bëri në vitin 2021.
“S’mund t’i ndajmë kështu. Siç ka mbetur aty në mur, në lumin e Vlorës, do bëjmë një memorandum tjetër. Do ju japim rezultatin. Mendojmë që do fitojmë shumë bindshëm, po për hir të së vërtetës dua të jem i drejtpërdrejt, fitorja kur ke përballë kundërshtarë të tillë në aspektin aritmetik është minimumi. Të hysh në fushë me kundërshtarë që nuk janë në lartësinë e duhur nuk është e vështirë të fitosh. Çështja është të shkosh përtej fitores aritmetike.”-tha Rama.
