Rreth 2.5 ton uranium që supozohej të ruhej në një vend në Libi nuk ishte aty kur inspektorët e Agjencisë Ndërkombëtare të Energjisë Atomike (IAEA) erdhën për të vizituar, raportoi Reuters të mërkurën duke cituar një deklaratë konfidenciale nga mbikëqyrësi i OKB-së.
Inspektorët e IAEA ‘kanë zbuluar se 10 kazane që përmbanin afërsisht 2.5 ton uranium natyral në formën e UOC (koncentrat mineral uraniumi) i deklaruar më parë nga Libia si i ruajtur në atë vend, nuk ishin të pranishme aty’, citoi Reuters Drejtorin e Përgjithshëm Rafael Grossi.
Kontrolli është kryer të martën. Fillimisht ishte planifikuar për vitin e kaluar, por ‘duhej të shtyhej për shkak të gjendjes së sigurisë në rajon’, vuri në dukje Grossi në raportin një faqe të dërguar anëtarëve të IAEA.
IAEA do kryejë ‘veprimtari të mëtejshme” për të përcaktuar vendndodhjen e uraniumit dhe se si u zhduk nga vendi. Agjencia nuk e emëroi vendndodhjen, duke thënë vetëm se nuk ishte nën kontrollin e qeverisë së njohur ndërkombëtarisht dhe se arritja e saj kërkonte ‘logjistikë të ndërlikuar’.
Humbja e njohurive për vendndodhjen e materialit bërthamor mund të paraqesë një rrezik radiologjik, si dhe shqetësime për sigurinë bërthamore.
Libia kishte marrë centrifuga për pasurimin e uraniumit dhe modele bombash atomike, por hoqi dorë nga programi i saj i armëve bërthamore në vitin 2003, në një përpjekje për të riparuar marrëdhëniet me Perëndimin. Tetë vjet më vonë, NATO mbështeti një kryengritje kundër qeverisë së Kolonelit Muammar Gaddafi në Bengazi, duke bombarduar Libinë në emër të militantëve.
Më 17 mars 2011, Këshilli i Sigurimit i OKB-së votoi pro propozimit të SHBA-s për të krijuar një ‘zonë të ndaluar fluturimi’ mbi Libi, për arsye humanitare. Brazili, Rusia, India, Kina dhe Gjermania abstenuan.
Brenda disa ditësh, NATO do niste një fushatë bombardimi kundër qeverisë, ndërsa marina e SHBA-së dhe e Mbretërisë së Bashkuar bllokuan bregdetin libian. Gaddafi u ekzekutua tmerrësisht në tetor 2011. Dikur ndër vendet më të begata në Afrikë, Libia shpejt u shkatërrua në luftë civile midis kryekomandantëve rivalë.
