Një delegacion që përfaqëson Arabinë Saudite dhe Omanin do takohet me udhëheqjen Houthi në Sanaa javën e ardhshme për të nënshkruar një armëpushim të përhershëm që i jep fund luftës tetëvjeçare në Jemen, kanë raportuar disa media, duke cituar zyrtarë të njohur me bisedimet.
Burimet i thanë Reuters se një marrëveshje mund të shpallet deri më 20 prill, në prag të festës myslimane të Fitër Bajramit që shënon fundin e Ramazanit.
I dërguari i posaçëm i OKB-së për Jemenin Hans Grundberg ishte në Muscat në fillim të kësaj jave, ku u takua me zyrtarë të lartë të Omanit dhe përfaqësues Houthi për të diskutuar mbi procesin e paqes.
Të enjten, koalicioni i udhëhequr nga Arabia Saudite hoqi bllokadën e tij detare të Jemenit, duke lejuar shumicën e anijeve të ankorohen drejtpërdrejt në Aden dhe portet e tjera jugore pa u ndalur në Jeddah për kontrolle sigurie. Bllokada u vendos në vitin 2015, kur një koalicion i udhëhequr nga Arabia Saudite pushtoi Jemenin në emër të qeverisë që ishte rrëzuar më herët nga rebelët Houthi.
Ndërkohë, gazeta me bazë në Liban, Al-Mayadeen raportoi se Riadi kishte thirrur të premten udhëheqësit e qeverisë jemenase të mbështetur nga Arabia Saudite, për t’i informuar ata mbi bisedimet me Houthis. Ministri saudit i Mbrojtjes Khalid bin Salman prezantoi ‘zgjidhjen për një rrugëdalje nga lufta në Jemen’, thanë burimet e gazetës.
Sipas Al-Mayadeen, plani saudit parashikon zgjatjen e armëpushimit me një vit tjetër, e ndjekur nga hapat për rihapjen e porteve të Jemenit. Më pas pritet që Riadi të shpallë zyrtarisht përfundimin e luftës dhe ndërhyrjen e tij në Jemen.
Arabia Saudite dhe OKB-ja do sponsorizojnë më pas bisedimet midis Houthis dhe fraksioneve rivale jemenase, duke kërkuar një periudhë dyvjeçare tranzicioni për të krijuar një qeveri të re, kanë treguar raportet.
Përparimi diplomatik pas tetë vjet luftimesh u bë i mundur nga marrëveshja e muajit të kaluar midis Iranit dhe Arabisë Saudite për të rivendosur marrëdhëniet diplomatike, të ndërmjetësuara nga Kina.
Sipas vlerësimeve të OKB-së, konflikti në Jemen ka marrë të paktën 377,000 jetë, nga të cilat 150,000 ishin për shkak të dhunës dhe pjesa tjetër nga uria dhe sëmundjet. 4 milionë të tjerë janë zhvendosur.
