Presidenti ukrainas Volodymyr Zelensky foli të mërkurën me presidentin kinez Xi Jinping, partnerin më të rëndësishëm diplomatik të Moskës, në bisedën e parë telefonike mes dy liderëve që nga fillimi i pushtimit rus, sipas CNN.
“Kam pasur një telefonatë të gjatë dhe domethënëse me presidentin kinez Xi Jinping. Besoj se kjo thirrje, si dhe emërimi i ambasadorit të Ukrainës në Kinë, do t’i japë një shtysë të fuqishme zhvillimit të marrëdhënieve tona dypalëshe”, tha Zelensky.
Andrii Yermak, kreu i Zyrës Presidenciale të Ukrainës, e përshkroi thirrjen telefonike si “një dialog të rëndësishëm” në një postim në Telegram të mërkurën.
Transmetuesi shtetëror kinez CCTV raportoi gjithashtu thirrjen, gjatë së cilës Xi konfirmoi se një i dërguar do të udhëtonte në Ukrainë dhe vende të tjera për të ndihmuar në kryerjen e “komunikim të thellë” me të gjitha palët për një zgjidhje politike të krizës ukrainase.
Në një konferencë të mërkurën, Ministria e Jashtme e Kinës tha se i dërguari i saj në Ukrainë do të jetë Li Hui, Përfaqësuesi Special i Qeverisë Kineze për Çështjet Euroaziatike
Li është ish-ambasadori kinez në Rusi, i cili shërbeu në këtë post nga viti 2009 deri në vitin 2019.
Ministria nuk dha detaje të mëtejshme se kur Li do të bënte udhëtimin dhe cilat vende të tjera do të vizitonte.
