Bashkimi Evropian ka bllokuar importin e grurit, misrit e farave të lulediellit nga Ukraina në pesë shtete anëtare për të paktën një muaj. Masa hyri në fuqi të martën në mbrëmje dhe është planifikuar të përfundojë më 5 qershor, nëse nuk zgjatet.
Komisioni Evropian njoftoi ‘masat parandaluese të jashtëzakonshme dhe të përkohshme për importet’ e prodhimeve për ‘zbutjen e pengesave logjistike’ në Bullgari, Hungari, Poloni, Rumani dhe Sllovaki.
Kievi mund të përdorë ende ‘një procedurë të përbashkët tranziti doganor’ për të eksportuar përbërësit e grurit dhe vajit të farës në vendet e tjera anëtare të BE-së ose jashtë bllokut, por nuk mund t’i shesë ato në pesë vendet e ‘vijës së parë’.
Sofja, Budapesti, Varshava dhe Bratislava ishin ‘zotuar të heqin masat e tyre të njëanshme’ për katër artikujt ‘dhe çdo produkt tjetër që vjen nga Ukraina’, tha Komisioni.
Në këmbim, BE-ja do ofrojë ‘mbështetje financiare’ për fermerët e tyre. Asnjë numër nuk u dha në deklaratën e mbrëmjes së të martës, por raportet e mediave javën e kaluar folën për një paketë prej 100 milionë eurosh.
Sipas Komisionit, masa u miratua për të adresuar shqetësimet e fermerëve në pesë vendet kufitare, duke mbështetur ‘angazhimin e fortë të BE-së për të mbështetur Ukrainën dhe për të ruajtur aftësitë e saj për të eksportuar drithërat e saj’, masë e përshkruar si ‘kritike për të ushqyer botën dhe për të mbajtur çmimet e ushqimeve të ulura përballë agresionit rus’.
