Deputetja Jorida Tabaku pak pas përfundimit të mbledhjes së grupit parlamentar të PD-së, tregoi për mediat detaje nga diskutimet mes demokratëve.
Duke e lidhur me rezultatin zgjedhor të 14 majit, Tabaku tha se kemi nevojë që të kuptojmë se çfarë ka ndodhur.
Sipas Tabakut rezultati i 14 majit ishte humbja më e madhe e PD në këto vite, ndërsa shtoi se demokratët nuk duhet të kthehen te gabimet e së shkuarës.
“Pati diskutime për seancën e nesërme. Ne nuk mund të sillemi sikur nuk ka ndodhur asgjë. Diskutimet lidheshin dhe për situatën që po ndodh në PD. Kemi vendime për të marrë, opozita shqiptare në 14 maj ka pësuar humbje të madhe, nga më të mëdhatë. Kemi nevojë që të kuptojmë se çfarë ka ndodhur. Kemi nevoje për të nisur një tur dëgjese, reflektimi për të kuptuar se si mund të ringrihemi. Unë jam duke u konsultuar me anëtarët. E rëndësishme është që mos të përsëriten gabimet e së shkuarës, pa u nxituar. Ja detyrohemi këtë demokratëve edhe shqiptarëve.”, tha Tabaku.
