Më shumë se 230 makina të vjetra të pluhurosura, duke përfshirë disa klasike me vlerë disa qindra mijëra euro secila, po shiten në ankand në Holandë pasi ishin ruajtur për dekada nga një koleksionist i fshehtë, i njohur vetëm si z. Palmen.
‘Gallery Aaldering’ u bë pronar i koleksionit disa muaj më parë pasi Palmen, i cili nuk ka asnjë trashëgimtar, u detyrua ta shesë atë për shkak të moshës dhe shkaqeve mjekësore.
Ai kurrë nuk i tregoi makinat e tij, por përkundrazi i mbajti ato të fshehta, pasi frikësohej se mund t’ia vidhnin, tha Nico Aaldering nga ‘Galeria Aaldering’. Ai e përshkroi Palmenin si ‘një vetmitar që kënaqej me makinat e tij çdo ditë’, duke i ndezur ato rregullisht për t’i mbajtur motorët të shëndetshëm.
Palmen mund të përballonte blerjen e makinave falë investimeve të zgjuara, duke përfshirë në pasuri të paluajtshme, tha Hans van der Pluijm nga ‘Classic Car Auctions’, i cili drejton ankandin.
Koleksioni, të cilin Palmen e ruante në një kishë të papërdorur dhe në dy depo të pluhurosura, përmban makina nga markat si Alfa Romeo, Lancia, Maserati, Ferrari, Facel Vega, Aston Martin, Jaguar dhe shumë të tjera.
“Është një koleksion që ndoshta nuk do ta gjeni më kurrë në këtë gjendje, në këtë sasi”, tha Hans van der Pluijm nga ‘Classic Car Auctions’.
Ai vlerësoi se shumica e makinave do shiten mesatarisht midis 25,000 euro e 75,000 euro, por shtoi se disa prej tyre vlejnë qindra mijëra euro secila dhe njëra prej tyre, një ‘Lancia Aurelia B24 Spider America’ me timon të djathtë, mund të arrijë edhe 2.5 milionë euro.
Nga ky model u ndërtuan vetëm 240 makina dhe vetëm 57 prej tyre ishin me timon të djathtë.
“Ajo gjithashtu ka një dizajn shumë të veçantë. Është e veçantë në çdo formë dhe është e kërkuar në çdo koleksion,” tha Van der Pluijm.
Makinat mund të shikohen pas regjistrimit në datat 26-28 maj. Ankandi online tashmë ka filluar dhe përfundon më 7 qershor.
