Një valë sulmesh me dronë rusë në kryeqytetin ukrainas la një person të vdekur dhe ndezi zjarre rreth qytetit, thanë zyrtarët në Kiev herët të dielën, sipas CNN.
Kryetari i bashkisë së Kievit, Vitali Klitshko tha se forcat e mbrojtjes ajrore ukrainase kishin “kapur tashmë më shumë se 20 UAV (mjete ajrore pa pilot)” që po shkonin drejt kryeqytetit dhe paralajmëroi se “një valë e re dronësh është në rrugën e saj”.
Forcat Ajrore të Ukrainës thanë më vonë se 54 drone iraniane Shahed ishin lëshuar nga Rusia gjatë natës dhe se 52 prej tyre ishin shkatërruar nga forcat ukrainase.
“Armiku ndërmori një tjetër sulm brenda natës ndaj objekteve ushtarake dhe infrastrukturës kritike në rajonet qendrore të vendit, veçanërisht në rajonin e Kievit. Pranë zonës “Qendra” e Komandës Ajrore, shumica e dronëve sulmues u shkatërruan!” tha forcat ajrore në një postim në Twitter.
Një burrë 41-vjeçar vdiq në lagjen Solomyanskyi të qytetit pas sulmeve, ndërsa rënia e mbeturinave të dronit në një pikë karburanti plagosi një grua 35-vjeçare, tha kryebashkiaku Klitshko.
Rënia e mbeturinave të dronit shkaktoi gjithashtu zjarre në ndërtesa në të gjithë kryeqytetin, tha kryebashkiaku në Telegram.
Një zjarr që përfshin 700 metra katrorë (7,534 këmbë katrorë) ishte vënë nën kontroll, por ndërtesat në një sipërfaqe prej 1,000 metrash katrorë u dëmtuan, shtoi Klitschko.
Në lagjen Pecherskyi, qendra historike e Kievit, rënia e mbeturinave të dronit shkaktoi gjithashtu një zjarr në çatinë e një ndërtese nëntëkatëshe, tha Klitschko.
