Militantët e lidhur me ISIS-in vranë 37 persona dhe rrëmbyen gjashtë të tjerë në një sulm në një shkollë në Ugandën perëndimore pranë kufirit me Republikën Demokratike të Kongos, tha ushtria të shtunën.
Personeli ushtarak gjeti trupat e të vdekurve kur mbërriti në shkollë, tha në një deklaratë zëdhënësi i mbrojtjes Felix Kulayigye.
“Forcat tona po ndjekin armikun për të shpëtuar të rrëmbyerit dhe shkatërruar këtë grup”, tha ai më herët në Twitter. Sulmuesit, nga grupi rebel i Forcave Demokratike Aleate (ADF), u larguan drejt Parkut Kombëtar Virunga në Kongo, tha policia.
Policia tha se tetë persona të tjerë ishin në spital me lëndime kritike pas sulmit në shkollën e mesme Lhubirira në Mpondwe.
Televizioni privat NTV Uganda tha në Twitter se numri i të vdekurve ishte 41, ndërsa gazeta shtetërore New Vision tha se ishte 42.
New Vision tha se 39 nga të vdekurit ishin studentë dhe se disa nga të vrarët vdiqën kur sulmuesit vendosën bomba ndërsa iknin.
