Djali i presidentit amerikan Joe Biden, Hunter Biden, do deklarohet fajtor për dy kundërvajtje tatimore federale, sipas një dosjeje të Departamentit të Drejtësisë në Delaware të martën.
Biden do lidhë gjithashtu një marrëveshje prove në lidhje me blerjen e një arme zjarri në kohën kur ishte përdorues droge.
Ai pritet të paraqitet personalisht në gjykatë për një akuzë në një datë të ardhshme.
Marrëveshja, e cila pason muaj të tëra diskutimesh midis prokurorëve federalë dhe ekipit ligjor të Hunter Biden, do shohë atë të pranojë dënimin me kusht për akuzat për kundërvajtje për mospagimin e taksave të tij të vitit 2017 dhe 2018 në kohën e duhur.
Departamenti i Drejtësisë do e akuzojë gjithashtu Biden në lidhje me blerjen e një pistolete në kohën kur përdorte drogë, megjithëse ka rënë dakord të mos e ndjekë penalisht atë për këtë çështje.
Marrëveshja, e cila i nënshtrohet miratimit nga një gjykatës federal, ka të ngjarë të jetë një temë kyçe gjatë zgjedhjeve presidenciale të 2024 në SHBA. Është vendosur gjithashtu të zgjidhë një hetim në vazhdim për keqbërjet e supozuara nga Hunter Biden pa u përballur me rrezikun e një dënimi me burg federal.
“Hunter do marrë përgjegjësinë për dy raste të dështimit të pagesës së taksave në kohën e duhur në përputhje me një marrëveshje për pranimin e fajësisë,” tha në një deklaratë avokati i Biden, Christopher Clark.
“Një akuzë për armë zjarri, e cila do t’i nënshtrohet një marrëveshjeje për devijimin paraprak dhe nuk do të jetë objekt i marrëveshjes për pranimin e fajësisë, do ngrihet gjithashtu nga qeveria.”
Clark shtoi se ‘Hunter beson se është e rëndësishme të marrësh përgjegjësinë për këto gabime që ai bëri gjatë një periudhe trazirash dhe varësie në jetën e tij’.
Akuzat federale pasuan një hetim të zgjeruar mbi akuzat për keqbërje në aferat e biznesit të Hunter Biden nga prokurori amerikan në shtetin e lindjes së Joe Biden në Delaware, David Weiss, i cili kishte vazhduar që të paktën 2018. Weiss u emërua për të ndjekur çështjen nga ish-presidenti Donald Trump.
Hunter Biden, i cili ka punuar si lobist, avokat, bankier investimesh dhe artist, ka dhënë hollësi publikisht për betejat e tij me narkotikët në faza të ndryshme të jetës së tij. Megjithatë, disa kritikë republikanë e kanë akuzuar atë për një sërë krimesh të lidhura me një fushatë të supozuar të përdorimit të ndikimit për të fituar shuma të ndryshme.
Anëtarësimi i Hunter Biden në bordin e kompanisë ukrainase të energjisë Burisma, si dhe marrëdhëniet e pretenduara me Kinën, çuan në akuza se ai kishte përdorur pozicionet politike të babait të tij për përfitime personale.
“Presidenti dhe zonja e parë e duan djalin e tyre dhe e mbështesin atë ndërsa ai vazhdon të rindërtojë jetën e tij”, thuhet në një deklaratë të Shtëpisë së Bardhë të martën.
“Nuk kemi komente të mëtejshme.”
