Kina do vazhdojë të ndjekë një politikë të jashtme të pavarur duke ndërtuar një të ardhme të përbashkët për njerëzimin, tha presidenti Xi Jinping. Ai këmbënguli se Pekini po qëndron ‘në anën e duhur të historisë’.
Në një fjalim të përgatitur për Forumin e Biznesit BRICS në Afrikën e Jugut, Xi deklaroi se ‘hegjemonizmi nuk është në ADN-në e Kinës; as Kina nuk ka ndonjë motivim për t’u përfshirë në konkurrencën e fuqive të mëdha’.
Xi është ndër udhëheqësit në Johanesburg për samitin e 15-të të BRICS dhe zhvilloi bisedime me presidentin e Afrikës së Jugut Cyril Ramaphosa të martën. Megjithatë, presidenti kinez nuk mori pjesë personalisht në Forumin e Biznesit BRICS të mbajtur në të njëjtën ditë dhe fjalimi i tij u lexua nga ministri i Tregtisë, Wang Wentao.
Xi këmbënguli se Kina do mbetet e përkushtuar ndaj një politike të jashtme paqësore dhe të pavarur, me synimin ‘të ndërtojë një komunitet me një të ardhme të përbashkët për njerëzimin’. Ai shtoi se ‘dera jonë është e hapur për këdo që dëshiron të angazhohet në bashkëpunim me ne’.
“Kina qëndron fort në anën e duhur të historisë dhe beson se një kauzë e drejtë duhet të ndiqet për të mirën e përbashkët”, tha udhëheqësi kinez.
Prosperiteti dhe zhvillimi duhet të promovohen për të gjithë anëtarët e komunitetit ndërkombëtar, ‘por një vend, i fiksuar pas mbajtjes së hegjemonisë së tij, ka dalë nga rruga e tij për të gjymtuar EMDC-të (tregjet në zhvillim dhe vendet në zhvillim),’ pohoi Xi.
Ai argumentoi se çdo përpjekje për të frenuar vendet në zhvillim do ishte ‘e kotë’ dhe se ‘rritja kolektive e EMDC-ve të përfaqësuara nga BRICS po ndryshon rrënjësisht peizazhin global’. Xi vuri në dukje gjithashtu se EMDC-të kanë kontribuar deri në 80% të rritjes globale në 20 vitet e fundit.
BRICS, i cili aktualisht përbëhet nga Brazili, Rusia, India, Kina dhe Afrika e Jugut, duhet të zgjerohet më tej, këmbënguli Xi, duke deklaruar: “Më vjen mirë të vërej se mbi 20 vende po trokasin në derën e BRICS. Kina shpreson të shohë më shumë anëtarësim në mekanizmin e bashkëpunimit BRICS.”
